Lơ̆m 'măng mă 2 âu, Kuôk hô̆i hop akŏm hơnơ̆ng đơ̆ng năr 19 truh đĭ năr 24/6. Kuôk hô̆i pơtoi pơma đam găh 10 tơdrong chih akŏm luơ̆t, hơlen, drơ̆ng nơ̆r 8 luơ̆t, 11 Tơchơ̆t. Lơ̆m pơgê năr 19/6, tơgop nơ̆r lơ̆m chih akŏm Luơ̆t Hnam oei (hơmet tơplih), rim bơngai tang măt pơkăl, tơchơ̆t khei năr pơgơ̆r hnam chŭng kư kiơ̆ khei năr kơ tơdrong tơchơ̆t ming man. Tơchơ̆t thoi noh gô pơyua ăn kon pơlei pơgơ̆r hnam oei păng tơpôl... Tơdrong hơtŏk hnam oei tơpôl kiơ̆ ăn thuê adoi đei lơ bơngai tang măt pơma đam chă trong jang tơnăp hloh ăn tơchơ̆t hnam oei tơpôl. Rim bơngai tang măt hmach bơnê kơ chih akŏm Luơ̆t hlôi tơlĕch hơmet dôm tơdrong oei tơjruh, tam mă 'lơ̆ng găh hơtŏk hnam oei, axong ming man hnam oei tơpôl, găh vei lăng hnam oei. Kiơ̆ bơngai tang măt Nguyễn Văn Hiển, khul Lâm Đồng, noh athei akŏm lơ̆m tơdrong tơm găh hơtŏk hnam oei tơpôl, pơm trŏ tơdrong kăl đei anih oei trŏ ƀlep ăn kon pơlei, ưh kơsĭ pơm kiơ̆ tơdrong kăl pơgơ̆r hnam oei ôh.