Pơma pơgơ̆r blŭng a ‘măng hop akŏm, Kơdră Kuôk hô̆i Vương Đình Huệ tơbăt: Tơchĕng hơdrol lơ̆m 23 năr bơ̆jang, Kuôk hô̆i set hơlen, tơchơ̆t dôm tơdrong gĭt kăl. Kŭm hăm tơdrong jang pơjing khôi luơ̆t, tơ̆ ‘măng hop akŏm âu, Kuôk hô̆i set hơlen pơdrơ̆ng kiơ̆ 20 tơdrong jang gĭt kăl. Mă hơdăh nhen Tơdrong jang tơmơ̆t jên jang pơm trong nơnăm đơ̆ng Trong gre 27C truh trong dêh char ĐT.656 dêh char Khánh Hòa - tơƀưh hăm Lâm Đồng păng Ninh Thuận; Hơmet ming trong jang tơmơ̆t jên jang pơm Dơnâu mong đak Ka Pét, apŭng Hàm Thuận Nam, dêh char Bình Thuận….

Tơ̆ ‘măng hop akŏm âu, Kuôk hô̆i set hơlen tơroi tơbăt đơ̆ng Khŭl kơdră teh đak găh hơlen lăng tơmơ̆t dơ̆ng pơtôch bơ̆jang kiơ̆ trong tơlĕch jang hơtŏk tơiung mŭk drăm - tơpôl păng jên jang teh đak; kĭ ăn hơlen lăng jên jang teh đak sơnăm 2021. Kơdră Kuôk hô̆i akhan, dôm khei blŭng sơnăm 2023, mŭk drăm teh đak bơ̆n hơnơ̆ng sơđơ̆ng, hơtŏk kơjă đei vei lăng, dôm tơdrong hơtŏ tih đei vei sơđơ̆ng, tơdrong arih sa tơpôl, đei yua ăn tơpôl păng tơdrong arih sa kon pơlei sơđơ̆ng.