Iung pơma tơ̆ pơgơ̆r blŭng a ‘măng Hop akŏm, Kơdră chĕp pơgơ̆r Kuô̆k hô̆i Vương Đình Huệ athei rim kơdră tang măt Kuô̆k hô̆i chă tơchĕng mă brĕ, hơlen mă ƀlep, tôm tong dôm tơdrong hlôi iŏk đei jơnei; tơƀôh hơdăh dôm tơdrong tim mă ‘lơ̆ng, tim mă lăp; tơlĕch nơ̆r, pơchoh trong vă iŏk đei jơnei kơtang hloh dơ̆ng kơ sơnăm 2023; lăng hơlen, tơchơ̆t dôm tơdrong jang, trong vă jang kiơ̆ pơprŏ jang atŏk tơ iung mŭk drăm-tơpôl, jên hu, kon jên bơ̆ jang teh đak sơnăm 2024.

‘Ngoăih kơ ‘noh, Kuô̆k hô̆i lăng hơlen, tơchơ̆t găh hơmet ming mĭnh ƀar tơdrong kơ Tơdrong tơchơ̆t 53 găh Hla bơar chih tơbăt tơdrong hơlen kĕ jang kơ Tơdrong vă jang iŏk tơvih teh, hrŭ ăn, tơgum djru, pơjing hơnih oei ‘nao Cham gre păr apŭng plĕnh teh Long Thành; lăng hơlen pơtôch jang kiơ̆ Tơdrong tơchơ̆t 43 găh trong bơ̆ jang lơ̆m jăl, jên hu tơgŭm ăn Tơdrong jang hơmet ming păng atŏk tơ iung mŭk drăm-tơpol; pơtôch dăr lăng tơdrong jang khôi luơ̆t kiơ̆ nơ̆r pơkoĕl lơ̆m Tơdrong tơchơ̆t 101 kơ Kuô̆k hô̆i jăl XV.

Pơgê năr 23/10, tơ̆ 'măng Hop akŏm mă 6, Kuôk hô̆i jăl 15, Thủ tướng teh đak bơ̆n Phạm Minh Chính hlôi tơroi gah tơdrong đei jơnei lơ̆m pơm kiơ̆ tơchơ̆t hơtŏk mŭk drăm – tơpôl sơnăm 2023; tơlĕch tơchơ̆t hơtŏk mŭk drăm – tơpôl sơnăm 2024. Kiơ̆ tơroi, mŭk drăm – tơpôl pơtoi hơmet 'lơ̆ng, mă tơm noh đei jơnei nhen tơchơ̆t tơlĕch; Mŭk drăm Việt Nam pơtoi jing anih hơdah kơ mŭk drăm lơ̆m kơpal teh.

Trong jang mŭk drăm pơtoi đei hơtŏk pran; hăt hot hơtŏk tơplih kơsô̆; Dôm tơdrong jang joh ayŏ, tơpôl đei asong jang păng hơtŏk, đei jơnei hơdah. Kiơ̆ tơdrong jang đei lơ̆m 9 khei, jô̆ hloi sơnăm 2023 adrin đei tŏ sĕt jat noh 10 lơ̆m 15 tơchơ̆t păng yak hloh kơ tơdrong tơchơ̆t. Atŭm hăm noh Thủ tướng hlôi tơchơ̆t tơm, atŭm hăm noh adoi ră hơdah 12 sơnong jang, trong jang tơm ăn sơnăm 2024 păng khei năr truh, lơ̆m noh ră hơdah 15 tơchơ̆t tơm gah tơdrong jang mŭk drăm, tơpôl păng cham char.