Hop akŏm akhan, ‘Măng hop akŏm mă 7, Quốc hội jăl 15 đei pơgơ̆r đang ‘lơ̆ng, jang kĕh rim tơdrong jang tôch lơ găh 3 tơdrong đei chih pơjing Luơ̆t, dăr lăng păng tơchơ̆t dôm tơdrong gĭt kăl kơ teh đak, hơnơ̆ng tơplih ‘nao, pơm lăp roi đunh roi ‘lơ̆ng ăn tơdrong ‘mĕh vă tơ̆ yăn âu. Kiơ̆ tơdrong tơchĕng, ‘Măng hop akŏm mă 8 vă pơgơ̆r lơ̆m ‘năr 21/10 păng pơtôch lơ̆m ‘năr 28/11.

Tơ̆ hop akŏm âu mơ̆n, tơchĕng adrol Quốc hội vă hơlen năng, pơdrơ̆ng nơ̆r ăn 11 kơ luơ̆t; tơgop nơ̆r ăn 12 kơ luơ̆t; hơlen năng dôm tơdrong jang mŭk drăm - tơpôl, jên thu mong, tơlĕch jang kơ teh đak, hơlen năng, pơgơ̆r apinh jet păng tơl nơ̆r apinh jet păng dôm tơdrong kăl nai hai. Kơdră Quốc hội Trần Thanh Mẫn akhan, kơsô̆ tơdrong chih pơjing luơ̆t, dăr lăng, tơchơ̆t dôm tơdrong gĭt kăl tơ̆ Hop akŏm mă 8 tôch lơ, lơ tơdrong pơmat tat kơna athei hơnơ̆ng pơgơ̆r hop akŏm mă 8 kiơ̆ 2 đơt vă dôm anih jang kơ Quốc hội mơ̆ng chih răk, tơl tơblang ăn dôm nơ̆r pơma đơ̆ng Bơngai tang măt Quốc hội ‘lơ̆ng hlŏh adrol kơ tơroi ăn Quốc hội drơ̆ng nơ̆r.