Iung pơma tơ̆ hop akŏm, Thủ tướng Teh đak Phạm Minh Chính pơma hơdăh ‘măng hop akŏm vă lăng hơlen tơdrong, sơkơ̆t hơdăh tơdrong pơkoĕl, trong vă jang, drơ̆ng mĭnh nơ̆r trong jang, tơdrong pơkăp păng dôm tơdrong dăr lăng, hơmet pơ ‘lơ̆ng tơhlăk tơhlĭn lơ̆m rim tơdrong pơkăp kơ khôi luơ̆t.

Thủ tướng pơma hơdăh tơdrong pơkoĕl hăm bơ̆ jang kơ Hơnih chĕp pơgơ̆r ‘noh “Băt hơdăh bơngai, băt hơdăh tơdrong jang, băt hơdăh hơnăp jang, băt hơdăh khei ‘năr jang, băt hơdăh trong jang, băt hơdăh jang keh đang”; kăl hrôih pơjing khul jang tơgŭm ăn Hơnih chĕp pơgơ̆r ‘noh đei rim kơdră jang gơ̆h hơgei, tơnăp ‘noh kơdră chĕp pơgơ̆r, khul joăt jang, bơngai jang tơchĕng hơlen, kơ yuơ Kơ iĕng Kơdră chĕp pơgơ̆r Hơnih tơm Tư pháp pơm kơdră.