Tơ̆ Tân Thanh, đơ̆ng pơgê năr 14/2, khul bơ̆ jang hlôi plôh ‘măng, hơmet pơ ‘lơ̆ng trong yak ăn rim gre iĕ chơ tơmam drăm tơ̆ jăl trong tơm chơ choĕn tơmam drăm.

Dôm tơmam drăm tĕch răt hăm teh đak đe găh lơ ‘nŏh pơkao, plei ‘long hơdrih ‘noh đei pơ ŏ, mit, guga, pơkai. Lơ̆m năr, hlôi đei 110 tong gre chơ plei ‘long đei pơm hla bơar tĕch mơdro tơ̆ teh đak đe yak hloh ‘măng sơlam teh đak Tân Thanh. Găh tơ̆ ‘măng sơlam apŭng plĕnh teh Hữu Nghị, jô̆ truh ‘năr glơ̆h brei (14/2) hlôi đei hloh 30 tong gre chơ tơmam drăm tĕch tơ̆ teh đak đe (găh lơ ‘noh sâu riêng, mit, guga) păng 6 tong gre chơ tơmam drăm răt tơmơ̆t đơ̆ng teh đak đe. Đơ̆ng năr 18/2, rim ‘măng sơlam teh đak lơ̆m dêh char Lạng Sơn gô iung jang ăn gre mơ̆t lĕch gơ̆h dơ̆ng. Rim tơmam drăm đei chơ mơ̆t lĕch hiôk hian găn hloh ƀar ‘măng sơlam gĭt kăl kơ dêh char Lạng Sơn đơ̆ng dôm năr đơ̆ng rŏng Têt Nguyên đán đei hơmŏ ‘noh tơdrong hơ iă ăn bơ̆ jang tơdrong tĕch mơdro kơ tơring lơ̆m khei năr kơnh.