Năr 06/9/2023 tơ̆ Hơnih tơm Hà Nội, Tổng Bí thư  Nguyễn Phú Trọng, Kơdră chĕp pơgơ̆r Đảng Kon pơlei Campuchia (CPP) Samdech TechoHun Sen hăm Tổng Bí thư Đảng Kon pơlei Kĕch mang Lào, Kơdră chĕp pơgơ̆r Teh đak Lào Thongloun Sisoulith hlôi đei tơƀơ̆p dih băl kơdră kơpal Việt Nam - Campuchia - Lào. ‘Nau jĭ tơdrong pơgơ̆r tôch gĭt kăl vă hơmet pơ-‘lơ̆ng, atŏk kơtang hloh dơ̆ng tơgoăt tơgoăl ƀar păh pêng Đảng păng kon pơei pêng Teh đak Việt Nam - Campuchia - Lào lơ̆m khei năr tơdrong apŭng plĕnh teh, tơring hơnơ̆ng đei ƀôh ưh sơđơ̆ng păng pơđĭ pêng Đảng, pêng Teh đak yak mơ̆t lơ̆m jăl atŏk tơ iung ‘nao.

Tơ̆ ‘măng tơƀơ̆p, rim pang hlôi tơbăt dih băl găh tơdrong bơ̆ jang kơ đảng, teh đak kơdih, mă kăl bơ̆ jang tơ iung pơjing đảng păng atŏk tơ iung mŭk drăm-tơpôl; pơma dơnuh găh tơdrong lơ̆m apŭng plĕnh teh, tơring đei ƀôh kơtang tơjê̆ au păng dôm tơdrong mă pêng pang vang lăng truh; hơlen tơdrong jang hơdoi ƀar pah pêng Đảng, pêng Teh đak lơ̆m khei năr au ki. Kơdră chĕp pơgơ̆r pêng Đảng drơ̆ng mĭnh nơ̆r dôm trong pơchoh tơm ăn tơgoăt tơgoăl jang hơdoi ƀar păh pêng Đảng, pêng Teh đak lơ̆m rim tơdrong kơ yuơ đei iŏk yua ăn kon pơlei pêng teh đak lơ̆m khei năr au kơnh. Pêng pang drơ̆ng mĭnh nơ̆r hơnơ̆ng jang kiơ̆ ‘lơ̆ng rim trong pơkăp hlôi đei, chă tơchĕng hơlen pơjing mĭnh ƀar trong pơkăp jang hơdoi ‘nao vă atŏk kơtang tơgoăt tơgoăl ƀar păh pêng Đảng, pêng teh đak kơ yuơ đei iŏk yua ăn kon pơlei pêng teh đak, kơ yuơ rơngei hiôk hian, sơđơ̆ng, jang hơdoi păng atŏk tơ iung tơ̆ tơring păng lơ̆m apŭng plĕnh teh.