Lơ tơdrong tơroi, video đơ̆ng dôm trang fanpage đei ư hơnhang, tơplih kơmâu avatar dang ei jing kơmâu kok găm mă ưh ‘nŏh tơplih avatar hăm lơ um rup Ƀok Tổng Bí thư păng chih lơ nơ̆r pơma ƀĕnh jơhngâm đon ‘mêm kơ eng – ‘nŏh jĭ trong mă lơ bơngai tơƀôh jơhngâm đon ơh sơ ‘ngon, ‘mêm kơ eng kơ 1 ‘nu bơngai gơ̆h hơgei, đei jơhngâm đon ‘lơ̆ng hlôi lôch hơchăng kơ kăch mang Việt Nam lơ̆m mang tơpôl. Nhôn apinh đŏk dơ̆ng 1,2 nơ̆r chih ‘nŏh.

- ‘Mêm pơnach, hmach bơnê kơ mih, ih hlôi bơ̆ jang truh kơtĕch jơhngâm yoa kơ kon pơlei, yoa kơ teh đak.

- Tôch kơ ơ̆h sơ ‘ngon ăn Bơngai kon gơ̆h hơgei kơ Đảng Cộng sản Việt Nam.

- Đon lui kiơ̆ Đảng yoa đơ̆ng jơhngâm đon ‘lơ̆ng đơ̆ng Mih.

- Jơhngâm đon tơpăt ‘lơ̆ng, ưh đei pơang pơrŏ đơ̆ng Mih hlôi pơjing đei 1 trong arih xa tôch ‘lơ̆ng hơiă lơ̆m măt lăng đơ̆ng đĭ đăng kon pơlei.

- Apinh kŭp kơ̆l ƀât hơnăp pơhnglol Tổng bí Thư ‘măn lê̆ đon lui ‘lơ̆ng hơiă păng tơdrong arih ning mônh kơnh ‘lơ̆ng rŏ kơ teh đak!

-Rŏ năng hăm lơ bơngai, đe sư ưh lăp hlôh vao chủ nghĩa cộng sản ‘nŏh yă kiơ đĕch mă mưh lăng tơ̆ Tổng Bí thư, đe sư hlôh hloi 1 ‘nu bơngai cộng sản, mĭnh jơhngâm đon cộng sản ‘nŏh thoi yơ.

Facebook Quế Phương chih: "Bơngai lĕch đak măt, plenh teh kơtoh đak ‘mi... Kơ triu plei nuih Việt Nam ơ̆h sơ ‘ngon... Bơnê kơ ih yoa dôm tơdrong mă ih hlôi bơ̆ jang ăn teh đak."

...Oei đei lơ nơ̆r chih, thơ pơđơ̆k tơƀôh jơhngâm đon ‘mêm kơeng nai dơ̆ng. Lơ bơngai oei tơroi truh dôm tơdrong tôch hơiă mưh đei tơƀâp Tổng bí thư Nguyễn Phú Trọng adrol sơ̆. Tơ̆ trang mang kơdih, Bơngai tang măt Vũ Quang Minh – Bơngai tang măt ăn Việt Nam tơ̆ teh đak Đức, Bơngai tang măt so ăn Việt Nam tơ̆ Campuchia păng tơ̆ teh đak Anh, jang hloi tơ̆ Ireland tơroi dơ̆ng 1 tơdrong tôch hơiă ƀât ƀok kiơ̆ Tổng bí thư Nguyễn Phú Trọng năm hơpong tơ̆ Campuchia khei 7 sơnăm 2017:

-Tơ̆ Sihanoukville, ƀât oei hơmet anih vă pơgơ̆r tơdrong tơƀâp đơ̆ng Tổng Bí thư hăm ‘nhŏng oh bơ̆ jang tơ̆ Anih tang măt păng kon pơlei, Tổng Bí thư truh hrôih ƀât ‘nhŏng oh oei hơmet bơ̆n kơƀang. Ưh ê, Tổng bí thư mât tơ̆ lăm păng vang tung kơƀang hăm nhôn, hăm ƀĕnh tơdrong hlich, ưh tom băt đơ̆ng rim bơngai.

-Nhôn hơnơ̆ng pơma nuh hăm băl mưh ƀlŏk truh tơdrong ưh đei lai yơ gơ̆h hiơt âu, hơpơi ‘mĕh đei dơ̆ng lơ ‘măng tung hơmet kơƀang tang dŏ hăm ƀok, đei dơ̆ng dôm ‘măng tơƀâp, pơma nuh tôch hơiă nhen thoi 1 unh hnam âu".

Oei bơngai chih hla ar tơroi, ngê̆ nhân pơm hla che Hoàng Anh Sướng, 2 ‘măng đei tơƀâp Tổng bí thư Nguyễn Phú Trọng ling lang jing tơdrong ‘lơ̆ng hơiă ưh đei lai yơ hiơt, lơ̆m noh đei ‘măng nhă ngôi đak hla che sơng ƀok Tổng Bí thư, Kơdră teh đak Trung Quốc Tập Cận Bình. Bơngai chih hla ar tơroi, ngê̆ nhân pơm hla che Hoàng Anh Sướng chih:

"Ƀât ƀok Tập Cận Bình năm ngôi tơ̆ Việt Nam, ƀok Nguyễn Phú Trọng krao inh rơ̆ đak hla che ăn măr sư huch ngôi til pơgê ‘năr 13/11/2017 tơ̆ Hnam kơ jung Ƀok Hô. ‘Nâu jĭ ‘măng mă 2 inh đei tơƀâp, pơma nuh tơpăt hăm Ƀok.

Oei hơnơ̆ng bơngai ‘nŏh, jơhngâm đon rơhău ‘lơ̆ng ‘nŏh pơm ăn inh ƀôh ƀok Nguyễn Phú Trọng nhen thoi 1 ‘nu ƀok thây pơtho ƀiơ̆ kơ 1 ‘nu bơngai jang chinh trĭ. Păng đơ̆ng bưng ai ‘lơ̆ng‘nŏh sư pơm ăn jơ tơƀâp đơ̆ng 2 ‘nu ƀok Kơdră chĕp kơ̆l 2 teh đak – jĭ ƀok Tổng bí thư Nguyễn Phú Trọng păng Tổng bí thư Tập Cận Bình tôch hơiă, hiôk rơngơp lơ̆m jơhngâm.

Yoa thoi noh, đơ̆ng rŏng âu, lăng ƀôh dôm tơdrong “jang tang găn xa pơjĭp” đơ̆ng ƀok, inh chrih kơ đon ưh kơ ê. Ôn tơ̆ lăm jơhngâm đon rơhău, tơpăt ‘lơ̆ng, iâm dim nhen thoi 1 ‘nu ƀok thây ‘nŏh jĭ 1 jơhngâm đon tơpăt ‘lơ̆ng, pran kơjăp, khŏm tang găn pơđĭ tơdrong xa pơjĭp, phă hŭt tơdrong chư̆ kơnê̆. Kon pơlei ‘mêm kơ eng, kŭp yom kơ ƀok gơnơm đơ̆ng jơhngâm đon ‘lơ̆ng ‘nŏh.

 Ưh kĕ tơroi đĭ jơhngâm đon ‘mêm kơeng, dôm tơdrong hơiă mă kon pơlei ‘măn ăn ƀok Tổng bí thư Nguyễn Phú Trọng – kơdră chĕp kơ̆l đei kon pơlei tôch ‘mêm, bôl boăl lơ̆m apŭng plenh teh kŭp yom; mĭnh jơhngâm đon ‘lơ̆ng tih, năng “Bưng ai jĭ tơdrong tôch sĭt, tơdrong kăp gĭt hlŏh”, vei kơjăp jơhngâm đon tơpăt ‘lơ̆ng, arih đĭ jơhnơr yoa teh đak, yoa kon pơlei.

Mĭnh plei nuih pă đei tơteh bơih, kơtriu kơtoh đak măt lĕch huŏng./.