Bí thư Đảng apŭng Mù Cang Chải – ƀok Nông Việt Yên ăn tơbăt: Khei 6/2019, Anih jang đảng apŭng Mù Cang Chải tơlĕch tơdrong jang “Năr hơtuch giĕng hơdai hăm kon pơlei” vă hơtŏk tơdrong pơvei, mât 1 ƀơ̆r đon đơ̆ng kăn ƀô̆, đảng viên hăm kon pơlei, tang găn đon jang ưh tơnăp, hơtăih kon pơlei păng bơ̆ jang trong jang “Chă mơ̆ng, kơchăng pơma nuh hăm kon pơlei, đĭ jơhngâm pơvih ăn kon pơlei”.

Kiơ̆ kơ ‘nŏh, rim kăn ƀô̆, đảng viên ‘ngoăih kơ jang tơ̆ anih jang kiơ̆ tơdrong jang đei pơjao, rim khei athei hơmet jơnăr ăn kơ dih, ‘măn tŏ sĕt hlŏh ‘nŏh 2 năr hơtuch giĕng jur hăm kon pơlei tơ̆ pơlei pơla đei pơjao vei lăng vă roi tơbăt trong jang đơ̆ng Đảng, tơdrong tơgŭm, khôi luơ̆t đơ̆ng teh đak; tơgŭm ăn kon pơlei jang tŏk mŭk drăm, sut pơđĭ pơngot, tơjur tơnuh hin; hơtŏk đon kơ chăng tơ̆ hơnăp dôm nơ̆r pơma hơlĕnh pơdăr chă trong phă ngơ̆r, tơjră plơ̆ Đảng, teh đak truh hăm kon pơlei; băt hơdăh rim tơdrong, đon hơpơi ‘mĕh đơ̆ng kon pơlei, kŭm hăm kon pơlei hơmet pơ ‘lơ̆ng dôm tơdrong pơmat tat, tơtŏ đon lơ̆m tơdrong arih xa, jang xa.

“Hăm đon pơhnŏng truh sơnăm 2030 Mù Cang Chải ưh pă đei năng jĭ apŭng tơnuh, nhôn chih hơdăh "Năr hơtuch giĕng hơdai hăm kon pơlei" jĭ tơdrong kăl bơ̆ jang hai, trong vă jang tŏk pran hai. Mă 2 dơ̆ng jĭ anih vă Khul kơdră chĕp kơ̆l, pơgơ̆r đảng ƀô̆ apŭng pơtâp pơhrăm păng hơlen năng kăn ƀô̆. Mă 3 ‘nŏh iŏk tơdrong ‘nâu vă hơlen năng đon jang tơnăp đơ̆ng đe kăn ƀô̆, pơm thoi yơ vă mât 1 ƀơ̆r đon, jang hơdoi kơjăp hlŏh dơ̆ng đơ̆ng kăn ƀô̆, đảng viên hăm kon pơlei.”

Hlŏh 5 sơnăm bơ̆ jang trong jang “Năr hơtuch giĕng hơdai hăm kon pơlei”, vă jê̆ 30.000 ‘nu kăn ƀô̆, đảng viên, bơngai jang ăn teh đak; hlŏh 90.000 ‘nu kon pơlei vang bơ̆ jang lơ̆m dôm tơdrong jang tôch hơdăh tơ̆ pơlei pơla, kueng kơ phô̆. Mă hơtuch man hơmet hlŏh 300km trong nơnăm tơ̆ tơring tơrang păng pơih ‘nao hlŏh 62km trong teh; pơgơ̆r hlŏh 25.500 ‘măng roi tơbăt trong jang đơ̆ng Đảng, tơdrong tơgŭm, khôi luơ̆t đơ̆ng teh đak; hơtŏk tơdrong jang mŭk drăm, tơpôl, tang găn tơdrong jĭ, tang găn tơdrong yoch.

Dôm tơdrong jang ‘nâu vang tơgop pơm ăn um ai tơring tơrang tơ̆ Mù Cang Chải tơplih roi ‘lơ̆ng; iŏk yoa jô̆ păh lăp kiơ̆ kơ̆l bơngai sơnăm 2023 đei 34 triu hlak jên 1 ‘nu, tŏk 70% pơting hăm ƀât blŭng jăl jang. Jô̆ păh lăp đơ̆ng blŭng jăl jang truh dang ei, rim sơnăm apŭng tơjur đei hlŏh 9% kơsô̆ unh hnam tơnuh, pơm ăn kơsô̆ unh hnam tơnuh tơ̆ apŭng jur pă 38,45%. Yă Giàng Thị Khua, kon pơlei tơ̆ xăh Hồ Bốn, apŭng Mù Cang Chải chơt hơiă ăn tơbăt: “Rim bơngai tôch čhôk ‘nă yoa đei lơ bơngai vang jang ‘nŏh sư ƀônh ƀiơ̆ kơ 1 ‘nu; mă loi, jô hloi tơdrong pơm trong mât tơ̆ hnam nhôn, kŭm đei đe kăn ƀô̆ vang jang, vang tơgŭm. Kon pơlei hăm đe kăn ƀô̆ roi jê̆ băl ƀiơ̆.”

Hơnơ̆ng jur tơ̆ tơring hăm kon pơlei lơ̆m dôm năr hơtuch giĕng, Bí thư Đảng dêh char Yên Bái – ƀok Đỗ Đức Duy tơroi: dôm khei blŭng sơnăm 2019, đơ̆ng rŏng kơ Khul kơdră chĕp kơ̆l đảng apŭng Mù Cang Chải tơroi găh dôm tơdrong tơchĕng blŭng a vă pơgơ̆r jang kiơ̆ trong “Năr hơtuch giĕng hơdai hăm kon pơlei”; ‘nŏh inh ƀôh ‘nâu jĭ trong krao hơvơn kon pơlei tôch đei yoa đơ̆ng khul kơdră pơgơ̆r tơring, gơ̆h jang kiơ̆, lăp hăm yăn âu, Khul kơdră chĕp kơ̆l đảng dêh char Yên Bái drơ̆ng nơ̆r rơih iŏk trong jang đơ̆ng apŭng Mù Cang Chải vă jang pơlong hơdrol, đơ̆ng rŏng kơ ‘nŏh chih iŏk dôm tơdrong kăl ƀlă đơ̆ng noh pơih xă tơ̆ jơ̆p Đảng ƀô̆ dêh char.

Đơ̆ng rŏng vă jê̆ 05 sơnăm bơ̆ jang dôm Trong jang đơ̆ng Khul kơdră chĕp kơ̆l dêh char, Tơdrong jang “Năr hơtuch giĕng hơdai hăm kon pơlei” akŏm đei tơdrong vang jang đơ̆ng lơ kăn ƀô̆, đảng viên păng kon pơlei kiơ̆ đơ̆ng kơdih ‘mĕh vang jang, ưh đei jang vă pơtrŏ, vă pôk pơ ư kơdih kâu. Khul kăn ƀô̆, đảng viên ưh đei ơm, ưh đei hli tơdrong pơmat tat, gleh hrat vang bơ̆ jang dôm tơdrong nhen: vei rơgŏh cham char, dônh, mong akŏm râm rĕk, man hnam hŏk hôp, pơm trong tơ̆ tơring tơrang, tơgŭm ăn kon pơlei jang tŏk mŭk drăm.

“Nhôn hơnơ̆ng pơtôch, hơlen năng, pơih xă dôm trong jang, pôk pơ ư bơngai jang rơgei, trong jang hơiă đei yoa hơdai hăm Hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô. ‘Nâu jĭ tơdrong jang hơnơ̆ng, kŭm jing 1 lơ̆m dôm trong chĕp kơ̆l pơgơ̆r đơ̆ng đảng ƀô̆ dêh char, atŭm hăm ‘nŏh jĭ 1 lơ̆m dôm trong jang vă bơ̆ jang hơnăp jang tơƀôh trong chong glung, năm hơdrol, tơnăp ‘lơ̆ng đơ̆ng kăn ƀô̆, đảng viên lơ̆m tơdrong jang, oei xa tơklep hăm tơring, bơ̆ jang jê̆ hăm kon pơlei."

Đei yoa đơ̆ng trong jang "Năr hơtuch giĕng hơdai hăm kon pơlei" hlôi păng tŏk bŏk tơgop ‘lơ̆ng vă Mù Cang Chải jăh jang đang dôm tơdrong hơgăt mă Hop akŏm Đảng ƀô̆ dêh char păng Tơdrong tơchơ̆t đơ̆ng Hop akŏm Đảng ƀô̆ apŭng, jăl jang đơ̆ng 2020 - 2025 tơlĕch, hơnhăk tơring âu tŏk jing apŭng chă tơmang lăng, anih truh “Ƀĕnh tơdrong juăt ‘lơ̆ng, sơđơ̆ng ‘lơ̆ng rŏ” kơ dêh char păng lơ̆m teh đak; truh sơnăm 2025 lĕch đơ̆ng hơnăn dôm apŭng tơnuh păng hơđơ̆ng jơhngâm jang tŏk kiơ̆ trong tơplih ‘nao, mât hơdai păng tŏk pơdrŏng./.