Hơnơ̆ng pơgơ̆r bơ̆ jang lơ̆m tơdrong jang tơbôl đơ̆ng Anih Trung ương Mặt trận Tổ quốc Việt Nam hăm Anih jang Chính hiệp teh đak Trung Quốc păng Mặt trận Tổ quốc - Chính hiệp dôm dêh char, Tơring pơgơ̆r kơdih tơ̆ tơring sơlam kơ 2 teh đak, kơsơ̆ ‘năr 28/11, Hop akŏm pơma nuh găh tơdrong juăt jang đơ̆ng 2 păh đei pơgơ̆r tơ̆ plt Hạ Long, dêh char Quảng Ninh.

Pơma hơdăh Mặt trận Tổ quốc Việt Nam păng Chính hiệp teh đak Trung Quốc jĭ 2 anih jang đei hơnăp jang tôch gĭt kăl lơ̆m tơdrong arih xa, bơ̆ jang chinh trĭ tơ̆ rim teh đak, 2 păh vang roi tơbăt, pơma nuh găh tơdrong juăt jang păng trong jang tơplih ‘nao, hơtŏk tơdrong ‘lơ̆ng, hơtŏk hơnăp jang dăr lăng, tơblang tơƀôh lơ̆m tơpôl păng vang tơiung pơjing Đảng, pơjing Khul kơdră pơgơ̆r; chih akŏm, chă mơ̆ng nơ̆r pơma, apinh đơ̆ng kon pơlei hăm Đảng, teh đak. Mặt trận Tổ quốc Việt Nam păng Chính hiệp Trung Quốc kơ dôm dêh char, apŭng, xăh đei trong sơlam hơdai vang jang hơdoi chă roi tơbăt, krao hơvơn kon pơlei tơ̆ tơring sơlam Việt Nam - Trung Quốc rơngei hiôk hian, jang tơbôl păng jang tŏk hơdai…