Kiơ̆ đơ̆ng Hơnih jang dăr lăng hơlen tŏ ‘mi kial dêh char Lâm Đồng, lơ̆m dôm năr ou ki, lơ̆m dêh char đei ‘mi păh ai truh ‘mi tih păng đei tơring ‘mi tôch kơ tih. ‘Mi tih atŭm hăm dôm tơdrong hơmơt đei đak lơ̆p tơ̆ tơring thŭng, tơring tơter đak kroong, teh tơdrŭt hơlih tơ̆ rim pro groi nak.

Hơnih vei lăng kon pơlei dêh char Lâm Đồng hlôi chih pơtruh hla bơar pơrô̆ athei rim hơnih bơ̆ jang iung jang akŏm tơlĕch jang rim trong jang tang găn teh tơdrŭt hơlih, đak lŏk jrŏh. Hơnih vei lăng kon pơlei rim apŭng, pơlei tơm Đà Lạt păng Bảo Lộc pơrô̆ tơlĕch jang chă gak prăt măng prăt năr lơ̆m pơyan ‘mi kial hơbŭt hơbông, dăr lăng kơjăp ‘mi kial, tơbăt tơtom truh hăm rim pơlei pơla, kon pơlei vă vang iung jang tang găn hơlau păng tơjră tang găn hăm tơdrong ‘mi kial hơbŭt hơbông, đak lip, teh tơdrŭt hơlih pơrăm.