Asong ming man ah sơnăm 2017, jăl trong veh gah Pơbah pơlei tơm Bảo Lộc, dêh char Lâm Đồng pơtơm ming man, kon pơlei lơ̆m tơring sô̆ hơ-iă dêh. Mưh jăl trong âu keh đang ưh hơdrô̆ tơjur ƀiơ̆ tơdrong tơhlăk tơhlĭn trong nơnăm tơ̆ jăl trong 20 jăl găn Bảo Lộc, mă oei pơm trong hiôk ăn tơdrong hơtŏk mŭk drăm păng tơdrong hơrih kon pơlei lơ̆m tơring. Ƀok Phạm Minh Thuận, tơ̆ phương Lộc Sơn, pơlei tơm Bảo Lộc ăn tơbăt, kon pơlei tơ̆ âu gô chang rim năr gơh yak tơ̆ jăl trong ‘nao, mă lei ưh kơ băt kơlih kiơ jăl trong tŏk bŏk oei đei ming man noh athei pơdơh hloi.

Tơdrong ming man pơdơh pơm ăn lơ anih hlôi hư răm, drơh trong tơhlŭn pơchah... pơm huach lơ kon jên kơ Teh đak:  “Jăl trong âu nhen anih tơm dơnơm kơ tơring Bảo Lộc. Kon pơlei hơrih đunh đai tơ̆ âu đơ̆ng sơnăm 1954 truh dang ei, ah trong vih vơ̆t đei pơih să noh gô hơtŏk tơ-iung hadoi hăm pơlei tơm. Adoi hơpơi ‘meh jơnŭm pơgơ̆r tơring pơtruh nơ̆r hăm Kuôk hô̆i vă dah keh đang ming man jăl trong âu, ah tong hơnê̆ pơlei tơm bu mă lê̆ jăl trong kơplah kơplơt thoi âu huach jên đĕch”.

Tơdrong ming man kơplah kơplơt, dôm anih ming man ưh đei drơ̆ng băl jing tơdrong tơm pơm đei lơ tơdrong sar bar kiơ̆ trong nơnăm pơm lôch bơngai tơ̆ jăl trong âu. Khei 3/2023, minh ‘nu bơngai drŏnglo 54 sơnăm vơ̆r gre hơyuh chơ sau 4 sơnăm, truh ah anih gơng tam mă keh đang tam mă đei pơsei dơ̆t ah jăl trong veh, trong găn xah Lộc Nga, pơlei tơm Bảo Lộc noh huơ̆ng tơ̆ hang hơ̆ng pơm bre ƀok sau lôch hiong.

Pơtoi kơ noh, ah hơtuch sơnăm 2023, minh ‘nu tơdăm adoi lôch ah anih âu ƀơ̆t vơ̆r gre hon đa huơ̆ng ah hang hơ̆ng jrŭ kơlih tơblơ̆r ah anih tơhlŭn pơchah tơ̆ jăl trong veh. Kiơ̆ kơ ƀok Hoàng Xuân Hậu, tơ̆ thôn 3, xah Đại Lào, pơlei tơm Bảo Lộc, mă jơnŭm pơgơ̆r tơring hlôi chih tơbăt anih hli hlơt mă lei sar bar hơnơ̆ng kơ đei, mă hăt noh hăm dôm bơngai đơ̆ng tơring nai truh: “Kon pơlei chă vih vơ̆t noh lơ mă trong noh hư răm păng hơlih. Mưh năm đơ̆ng gah âu noh ưh kơ ƀôh kiơ ôh, oei ƀôh anih kơđeh gah to mă lei ngeh jăl trong oei pơtoi dih băl mă tơpă noh trong tơhlŭn đơ̆ng 3,5-4m, mưh ‘mi tih păng kơmăng kơmơ̆t noh nhen băl đĕch. Ƀôh tơmoi đơ̆ng hơtaih truh noh nhôn athei tơroi tơbăt, chơng đe sư, gre vih vơ̆t tơ̆ tơring noh atheid de vih tơ̆ rŏng vă tang găn sar bar. Hơpơi ‘meh Jơnŭm pơgơ̆r teh đak, rim jăl kơpal tơrĕk ƀiơ̆ truh jăl trong âu”.

Kiơ̆ kơ ƀok Trần Đình Văn, Phŏ Ƀĭ thư Tĭnh uy, Kơdră Khul tang măt ăn Kuôk hô̆i dêh char Lâm Đồng, tơdrong ming man jăl trong lê̆ kơplah kơplơt thoi âu lơ̆m lơ sơnăm pơm ăn jăl trong veh gah pơbah pơlei tơm Bảo Lộc hư răm, pơm huach jên hu su kăk păng pơdui hloi lơ tơdrong ưh kơ ‘lơ̆ng hlôi đei kon pơlei pơtruh nơ̆r lơ ‘măng. Khul jang tang măt ăn Kuôk hô̆i dêh char Lâm Đồng adoi pơtruh nơ̆r păng Jơnŭm pơgơ̆r teh đak hlôi drơ̆ng nơ̆r pơtoi asong 320 tih hlj vă ming hơmet pơkeh jăl trong âu lơ̆m khei năr truh: “Jăl trong veh Bảo Lộc âu noh Khul tang măt ăn Kuôk hô̆i adoi pơtruh nơ̆r lơ ‘măng bơih. Jăl trong âu hlôi đei lơ sar bar bơih, đang kơ noh tơdrong vih vơ̆t adoi tơnap tap, ‘mê̆ ‘mach cham char lơ̆m tơring... Yơ̆ng âu ki, Phŏ Thủ tướng Lê Minh Khái adoi hlôi pơtruh nơ̆r hăm tơdrong mă âu. Hơdah, gô asng hloh 320 tih hlj đơ̆ng jên asong jang kơ teh đak vă keh đang jăl trong veh Bảo Lộc”.

Tơdrong ming man jăl trong veh gah Pơbah pơlei tơm Bảo Lộc jing tơdrong pơkăp ming hơmet jăl trong 20 găn tơring kơ 2 dêh char Đồng Nai păng Lâm Đồng kiơ̆ pơkăp BT (ming man – pơjao). Tơdrong ming man kơyuơ Anih tơm jang gah trong nơnăm jing anih tơchơ̆t asong ming man păng Kŏng ti Cổ phần BT20 - Cửu Long pơgơ̆r ming man. Tơdrong ming man trong hơtaih 15km hăm jên asong jang hlôi đei hơmet noh hloh 720 tih hlj. Ah hơtuch sơnăm 2020, lơ̆m kơplah ming man đei 70% tơdrong jang noh athei pơdơh lê̆ đơ̆ng khei năr noh truh dang ei kơlih ưh kơ mah jên.