‘Nhŏng Trần Hải Đăng, Kơdră chĕp pơgơ̆r Tơnô̆ jang XL02, Tơdrong vă jang Vũng Áng – Bùng, trong gre găn hloh dêh char Quảng Bình tơbăt: Hrei ou hơnih hlôi hơvơn đei 800 ‘nu bơngai jang akŏm ming man prăt măng prăt năr, prăt dôm năr Têt vă jang keh đang ƀlep trong tơlĕch ăn:“Hơnih ming man hơnơ̆ng prach hơdăh ŭnh kơđeng, pơgĕnh ‘năr hơlăng, nhôn klăh asong 3 khul jang hơnơ̆ng prăt măng prăt năr (24/24) hloi. Tơ̆ rim hơnih ming man nhôn klăh asong lơ bơngai chă jang hơnơ̆ng. Jơ ‘năr têt vih hăm ŭnh hnam ‘noh jĭ tôch kơ chơt hơ iă, mă lei kơ yuơ tơdrong jang, nhôn oei tơ̆ ou, vang tơgop tŏ sĕt jơhngơ̆m bơ̆n, hơdrin jang keh đang rim hơnih ming man tơm kơ teh đak…”.

Dăh mă tơ̆ rim hơnih ming man anai lơ̆m jăl trong gre rĕnh Tu-Pơbăh, rim hơnih ming man tĕnh koăng iung jang kơtang hloh, tơgop jang keh đang trong tơlĕch jang 3.000km trong gre rĕnh kiơ̆ nơ̆r athei đơ̆ng Thủ tướng teh đak. Jơhngơ̆m đon pơting dih băl ou đei dôm ƀô̆ đô̆i Binh đoàn 12 tơlĕch jang kơtang hăm kơrŭn đĭ ai, nhen nơ̆r tơbăt đơ̆ng Đại tá Nguyễn Tuấn Anh, Kơ iĕng Kơdră chĕp pơgơ̆r Binh đoàn 12, Kơ iĕng Kơdră chĕp pơgơ̆r Tổng công ty Tơ iung pơjing min man Trường Sơn:“Ming man rim jăl trong gre rĕnh, nhôn lăng kơjăp truh tơdrong kih thuơ̆t ming man tơ̆ teh rơmoăn. Kăl tuh tĕh mrĕt trei kơjăp ‘noh mă ming man. Vă jang keh đang kiơ̆ trong tơlĕch ăn, nhôn hơvơn khul jang kmăi kmŏk tôm tong, đơ̆ng noh chă hơvơn lơ̆m jơ ‘năr kăl akŏm khul jang vă ming man, sơđơ̆ng keh đang păng kơjăp ‘lơ̆ng kơ trong gre rĕnh”.

Sơnăm 2025 ou, pơlei tơm HCM jei tơlĕch lơ tơdrong jang ming man trong gre kăl, lơ̆m ou đei trong gre rĕnh, tơƀư̆h rim trong gre tơm lơ̆m pơlei tơm. Ƀok Bùi Xuân Cường, Kơ iĕng Kơdră chĕp pơgơ̆r Hơnih vei lăng kon pơlei kơ pơlei tơm Hồ Chí Minh tơbăt, jang kiơ̆ khei iung jang kăl pơting dih băl 500 măng năr keh đang rim hơnih ming man, gô akŏm ming man rim hơnih jang kăl hăm kơrŭn đĭ ai, pơm tơƀưh rim trong gre rĕnh hăm trong gre kăl, tơgop pơtrŭt kơtang atŏk tơ iung mŭk drăm-tơpôl kơ pơlei tơm Hồ Chí Minh păng pơđĭ tơring găh Pơbăh:“Hơdrol Têt Nguyên Đán gô đei dang 10 hơnih jang tơlĕch jang. Adoi trong ver 3, kiơ̆ trong tơlĕch vă pơting dih băl đơ̆ng Thủ tướng Teh đak, ‘noh akŏm iung jang kơtang lơ̆m sơnăm 2025, vă tơmơ̆t iŏk yoa jăl trong 15km, tơƀưh hăm trong gre rĕnh Pơlei tơm HCM- Long Thành – Giầu Dây yak truh hăm Cham gre păr apŭng plenh teh Long Thành. Jang kiơ̆ jơhngơ̆m đon pơting dih băl, vei kơjăp jơ ‘năr jang, atŏk kơtang lơ̆m sơnăm 2025 vă  ming man rim trong gre sơđơ̆ng ƀlep nơ̆r pơkăp. ‘Ngoăih kơ ‘noh, gô akŏm tơlĕch jang rim tơdrong vă jang ‘nao nhen hơnih chơ choĕn apŭng plĕnh teh Cần Giờ”.

Jei lơ̆m dôm năr blŭng sơnăm, Kơdră chĕp pơgơ̆r Hơnih tơm vei lăng Trong gre nơnăm Trần Hồng Minh năm dăr lăng mĭnh ƀar hơnih ming man trong gre rĕnh Tu-Pơbăh. ‘Nao ou, tơ̆ 2 tơdrong jang trong gre rĕnh Vũng Áng - Bùng păng Bùng - Vạn Ninh, jăl trong găn hloh dêh char Quảng Ninh hlôi athei tơngla iŏk jang iung jang ming man kiơ̆ trong pơkăp, hơvơn kmăi kmŏk bơngai jang iung jang prăt jơ ‘năr Têt vă ăn gre gơ̆h rok ƀlep trong tơlĕch ăn. Kiơ̆ đơ̆ng ƀok Trần Hữu Hải, Kơdră chĕp pơgơ̆r Hơnih vei lăng tơdrong vă jang 6, tơngla tơmơ̆t jên jang, vă sơđơ̆ng keh đang ƀlep trong tơlĕch ăn, Hơnih vei lăng hlôi athei tơ-‘ngla iŏk jang tơmơt dơ̆ng kmăi kmŏk, bơngai jang, iung jang hơnơ̆ng prăt lơ̆m jơ ‘năr Têh vă jang keh đang ƀlep pơkăp. Truh dang ei, tơdrong jang ming man hlôi keh đang 70% tơdrong jang, tơchĕng lăng gô ming man keh đang ƀlep lơ̆m năr 30/4/2025.

Đei ƀơm truh tơdrong iŏk tơvih teh lơ̆m tơring, ƀok Trần Phong, Kơdră chĕp pơgơ̆r Hơnih vei lăng kon pơlei dêh char Quảng Bình tơbăt, truh dang ei, dêh char hlôi pơjao teh ăn rim hơnih ming man. Mă lei, dang ei tơdrong ming man găn hloh dêh char oei đei dang 40 ŭnh hnam ‘meh vă iung oei tơ̆ hơnih hle. Găh tơdrong ‘nou, Kơdră chĕp pơgơ̆r Trần Hồng Minh tơbăt, ‘nou tơdrong ‘meh vă tôch trŏ lăp, kăl đei jơ ‘năr păng trong hơmet pơ ‘lơ̆ng. Ƀơ̆t măt, Hơnih tơm păng rim tơ-‘ngla tơmơ̆t jên jang gô akŏm vă ming man keh đang păng ăn gre gơ̆h rok ƀlep lơ̆m năr 30/4/2025. Mă kăl, sơnăm 2025 hăm tơdrong ăn lơ tơdrong jang ming man kăl kơ Hơnih vei lăng trong gre nơnăm iung jang, adoi jang keh đang trong tơlĕch jang 3.000km trong gre rĕnh. Kơdră chĕp pơgơ̆r Hơnih tơm vei lăng trong gre nơnăm Trần Hồng Minh, pơkăp:“Lơ tơdrong tơhlăk tơhlĭn, tơnap tap hlôi đei hơmet pơ ‘lơ̆ng nhen, hơmet ăn groi teh, tơmam ming man, iung jang tơgŭm ăn rim tơdrong vă jang, mă kăl tơring găh Pơbăh. Truh dang ei, tơdrong jang ming man hơnih kăl hlôi sơđơ̆ng. Mĭnh ƀar tơdrong vă jang trong gre rĕnh Tu-Pơbăh nhen Trong gre rĕnh Quảng Ngãi – Khánh Hoà tơcheng lăng gô jang keh đang hơdrol khei ‘năr pơkăp 3-6 khei. Hơnih tơm gô atŏk kơtang tơgoăt tơgoăl, sơđơ̆ng iung jang kiơ̆ ‘lơ̆ng rim tơdrong jang sơnăm 2025”.

Tơlĕch jang kiơ̆ kơjăp nơ̆r pơrô̆ đơ̆ng Thủ tướng Teh đak “Mơmat tat tơ̆ yơ ‘noh hơmet pơ ‘lơ̆ng tơ̆ noh” păng “ Ưh pơma ưh, ưh pơma tơnap dêh", Hơnih tơm vei lăng trong gre nơnăm iung jang hơdoi hăm rim hơnih jang đei ƀơm truh pơgơ̆r iung jang hloi hăm tơring tơlĕch jang rim trong jang, tơgŭm ăn bơngai tơmơ̆t jên jang hơmet pơ ‘lơ̆ng ưh kơ măh tơmam drăm ming man, atŏk kơ tang ming man keh đang trong gre rĕnh hrôih hloh, atŭm tơlĕch jang kiơ̆ trong tơlĕch jang 3.000 km trong gre rĕnh lơ̆m sơnăm 2025 ou ƀlep trong tơlĕch jang, tơgop pơtrŭt kơtang atŏk tơ iung mŭk drăm teh đak lơ̆m chăl hle.