Lơ̆m 3 ‘măng glơ̆k pơm ăn 6 ‘nu lôch đei 2 ‘măng đei ƀôh tơ̆ pơlei tơm Kon Tum pơm ăn 3 ‘nu hơioh lôch păng 1 ‘măng đei ƀôh tơ̆ xăh Hơ Moong, apŭng Sa Thầy pơm ăn 1 ‘nu bơngai ‘lŏ păng 2 ‘nu hơioh lôch. ‘Măng glơ̆k tơ̆ đak jê̆ hloh đei ƀôh ƀơ̆t ‘năr 15/8/2024 tơ̆ thôn 5, xăh Đoàn Kết, pơlei tơm Kon Tum pơm ăn 2 ‘nu hơioh lôch. Lơ̆m jơnăr kơpal 3 ‘nu mon: Y La (17 sơnăm); Y Luyẽn (16 sơnăm) păng Y Lơi (14 sơnăm) oei hơdai tơ̆ plei Kon Rờ Bàng 1, xăh Vinh Quang, pơlei tơm Kon Tum năm buch tơđăh ƀa tơ̆ kơdơ chŭn thôn 5, xăh Đoàn Kết.

Ƀơ̆t kơplăh 3 ‘nu mon ôp tơđăh ƀa tơ̆ dơnâu đak tơruih cheh phe kơ ŭnh hnam ƀok Đặng Châu Phong ‘noh 2 mon Y La păng Y Luyẽn tơblơ̆r jơ̆ng tơ̆ dơnâu đak, glơ̆k lôch hloi. Kŭm hăm hơvơn khŭl kinh vang tơchă, dŏng sar bar, khŭl kơdră chĕp kơ̆l, grŭp tơpôl lơ̆m tơring hơnih đei ƀôh dôm ‘măng glơ̆k tơ̆ đak pơgơ̆r năm ngôi, pơlung ŭnh hnam đei tơdrong truh. Hơdai hăm hơtŏk loi dơ̆ng tơdrong jang tơroi tơbăt găh hơmơt glơ̆k tơ̆ đak đei ƀôh lơ̆m tơring.