Hnam trưng hŏk jăl 1 Tô Hiệu (pơlei tơm Buôn Ma Thuột, Dak Lak) ‘nao đei kơ thơ pơtruh nơ̆r ưh kơ iŏk pơkao đơ̆ng mĕ ƀă hŏk tro ƀlep ƀơ̆t tơbăt 41 sơnăm Năr thây kô pơtho Việt Nam. Kiơ̆ tơdrong tơm kơ thơ pơtruh nơ̆r, mưh truh năr lêh thây kô pơtho, hnam trưng iŏk tôch kơ lơ pơkao hmach thơ thâu đơ̆ng mĕ ƀă, hŏk tro.

Mă lei, kơ sô̆ pơkao âu hnam trưng lăp gơh yua lơ̆m 2,3 năr đang kơ ‘noh hŭt lê̆, tôch kơ brăh brư. Kô pơtho Đoàn Thị Tuyết Yến - Kơdră vei lăng Hnam trưng hŏk jăl 1 Tô Hiệu tơbăt, hnam trưng dang ei oei đei 55 ‘nu oh, yua đơ̆ng ŭnh hnam mơmat tat kơna tam mă đei jên răt the ƀao hiêm pơgang. Kiơ̆ đơ̆ng kơthơ pơtruh nơ̆r, hnam trưng ‘meh dôm anih mơdro sa, tơlih yua kơ asong pơkao ƀlep ƀơ̆t năr thây kô pơtho Việt Nam, hnam trưng apĭnh tơplih hăm trong asong the ƀao hiêm pơgang ăn hŏk tro đei tơdrong arih sa mơmat tat.  Lăp đơ̆ng rŏng kơ đei kơ thơ pơtruh nơ̆r đơ̆ng hnam trưng, hlôi đei 14 mon iŏk đei tơgŭm. Kơjă 1 the ƀao hiêm pơgang: 631.800 đồng.