Xăh Ea Bung găh xăh să hloh apŭng Ea Súp hăm vă jê̆ 30.000 héc ta. Lơ̆m xăh đei 1.060 ŭnh hnam, hăm 4.078 ‘nu bơngai, găh dôm bơngai Tày, Nùng, Mường, Thái, Êđê, Jrai, H’Mông, Chứt păng Yuăn. Đĭ đăng dôm pơlei adoi hlôi pơjing tơdrong jang Grŭp chă vei lăng tơdrong sơđơ̆ng teh đak, kŭm hăm khŭl lĭnh kơpal pơjing tơdrong jang đĭ đăng kon pơlei vei lăng kơjăp tơdrong pơm tơm sơđơ̆ng tơring sơlam. Dôm kơđông lĭnh vei lăng tơring sơlam Đắk Ruê, Yok Bruê kŭm kơchăng jang tơgŭm hơtŏk tơiung mŭk drăm - tơpôl, mă loi ‘noh jĭ tơdrong jang pơjing tơring tơrang ‘nao, tơgŭm dôm ŭnh hnam mơmat tat...

Lơ̆m pơgơ̆r năr akŏm hlôi pơgơ̆r dôm tơdrong jang joh ayŏ, tơplŏng kơdâu păng khăm hơmet jĭ, asong pơgang đĕch ăn kon pơlei. Yua đơ̆ng Hnam pơgang Hùng Vương, Nhân Ái pơlei tơm Hồ Chí Minh jang hơdai hăm hơnih khăm lĭnh kon pơlei bơ̆jang. ‘Măng âu, Anih tơm pơgơ̆r ƀô̆ đô̆i vei lăng tơring sơlam dêh char Đắk Lắk, Anih vei lăng kon pơlei apŭng Ea Súp… hlôi pơjao ‘mê đai ăn kơ 10 ‘nu păng khŭl jang pôk hơpăh ăn kơ dôm jĭt ‘nu bơngai, khŭl tơpôl hlôi jang đang hơgei hloh lơ̆m tơdrong jang “Đĭ đăng kon pơlei vang vei lăng tơring sơlam”.