Đơ̆ng pơgê hrôih, lơ kon pơlei đơ̆ng 11 pơlei lơ̆m xăh sơlam Ia Đal akŏm tơ̆ anih pơgơ̆r “Pơyan Puih mak tơnŏ jơhngâm đon kon pơlei”. Tơ̆ âu lơ mih ma duch nă vang ngôi pơchơt Têt, nhen thi pơm ƀĕng chưng, thi klơ̆m plei kon, dui băl, tŭl băl… Dôm unh hnam đei tơdrong arih xa pơmat tat đei kăn ƀô̆, linh tơ̆ tơring sơlam roi tơbăt “Kơdeng tơmam asong đĕch” vă chă rơih bơn hơbăn ao, iŏk phe, đak kho, đak măm, ƀôt ngok…

Mŏ Lục Thị Đương, bơngai Thái, tơ̆ thôn 4, tơroi, 14 sơnăm đơ̆ng pơlei tơ Thanh Hoá mât tơ̆ Kon Tum jang xa, rim ‘măng truh Têt mŏ đei arih dơ̆ng lơ̆m pơyan Têt kơ pơlei so sơ̆ păng ƀôh hơdăh jơhngâm đon ‘mêm đơ̆ng đe kan ƀô̆, linh vei lăng tơring sơlam: “Đei truh hăm Tết pơyan Puih mak tŏ tơring sơlam inh tôch hơiă ‘nă hal. Inh hiôk jơhngâm dêh yoa Kơđông linh vei lăng tơring sơlam tơgŭm ăn kon pơlei, nhen kon mon nhôn oei jê̆ Kơđông kŭm đei tơgŭm ‘năi”.

Oei ‘nhŏng Hà Văn Tình, ‘nŏh akhan: “Sơng Tết Ất Tỵ 2025 đei Ƀô đô̆i vei lăng tơring sơlam dêh char Kon Tum pơgơ̆r Năr pơm ƀĕng chưng ăn kon pơlei tơ̆ tơring sơlam âu tôch kơ chơt. Ƀlep ƀât năr âu nhôn đei ngôi pơchơt hơdai. Anih chĕp kơ̆l khul linh Ƀô đô̆i vei lăng tơring sơlam dêh char Kon Tum hlôi hơpăh lơ tơmam tôch kăp gĭt ăn kon pơlei. Rim unh hnam kon pơlei tôch chơt hơiă”.   

Ƀlep ƀât Têt hơdrĕch hơdrung sơnăm ‘nâu, xăh sơlam Ia Đal, apŭng Ia H’Drai đei Anih chĕp kơ̆l khul linh Ƀô đôi vei lăng tơring sơlam dêh char Kon Tum rơih pơgơ̆r tơdrong “Pơyan Puih mak tơnŏ jơhngâm đon kon pơlei” păng “Năr pơm ƀĕng chưng”. Tơ̆ âu, khul linh vei lăng tơring sơlam păng khul kơdră tơring hơpăh 400 blăh hla kơ, hloh 250 tơpu tơmam, 400 tŏ ƀĕng chưng, pơjao hŏk ƀŏng ăn 9 ‘nu oh kiơ̆ tơdrong jang “Chông ba oh năm hŏk”, trong jang “Kon rong Kơđông linh vei lăng tơring sơlam”; pơjao rơmo yŏng tơgŭm ăn 2 unh hnam tơnuh vă rong… Akŏm đĭ đăng jên tơmam đei hlŏh 350 triu.

Thiếu tá Nguyễn Văn Đại, Bơngai jang Chính trị tơ̆ Kơđông Ia Đal, ăn tơbăt, ‘nâu jĭ tơdrong tơƀôh jơhngâm đon ‘mêm bơnê đơ̆ng đe kăn ƀô̆, linh tơ̆ tơring sơlam hăm kon pơlei tơ̆ tơring sơlam ƀlep ƀât Têt truh: “Kiơ̆ đơ̆ng tơdrong jang ‘nâu gô hơmet kơjăp tơdrong pơvei đơ̆ng khul linh păng kon pơlei tơ̆ tơring sơlam. Kiơ̆ đơ̆ng âu vă nhôn vei kơjăp tơdrong juăt ‘lơ̆ng păng tơlĕch tơdrong jang kŭm hăm ƀô đôĭ vei kơjăp tơdrong pơm tơm, sơđơ̆ng ‘lơ̆ng tơ̆ tơring sơlam teh đak”.

Bơ̆ jang kiơ̆ trong “ưh đei hŭt hơchăng bu tơ̆ rŏng”, pơm ‘lơ̆ng ăn rim hnam, rim bơngai tơ̆ tơring sơlam đei xa Têt, sơng pơyan Puih mak ‘nao ngăl, hơnơ̆ng đơ̆ng ‘năr 19 - 25/1, ƀô đô̆i vei lăng tơring sơlam dêh char Kon Tum hrơ̆ch pơgơ̆r “Pơyan Puih mak tơnŏ ‘lơ̆ng jơhngâm đon kon pơlei” păng “Năr pơm ƀĕng chưng” tơ̆ 12 xăh tơring sơlam hăm teh đak Lào păng Campuchia. Đei băt, akŏm đĭ kơjă tơmam đei hơpăh păng tơdrong jang hơmet Têt Nguyên đán Ất Tỵ 2025 ăn kon pơlei tơ̆ 13 xăh sơlam lơ̆m dêh char Kon Tum đei hlŏh 1 ti./.