Tơ̆ jơ pơma đam, Thủ tướng Anthony Albanese hôn bơnê kơ Thủ tướng Phạm Minh Chính ‘măng mă blŭng năm hơpong tơ̆ Australia; tơchĕng ‘lơ̆ng tơdrong tơgop đơ̆ng khul Việt Nam lơ̆m tơdỏng jơnei atŭm kơ Hop akŏm tih gĭt kăl tơbăt 50 sơnăm tơdrong pơvei ASEAN– Australia pơgơ̆r tơ̆ Melbourne ‘năr 05-06/3 âu ki. 2 ‘nu kơdră pơma nuh, drơ̆ng nơ̆r vang jang hơdoi kơjăp vă bơ̆ jang kiơ̆ 06 trong jang tih khŏm hơnhăk tơdrong jang hơdoi lơ̆m rim tơdrong tŏk ‘lơ̆ng păng đei yoa hlŏh dơ̆ng.

Đơ̆ng rŏng kơ pơma đam, 2 Thủ tướng pơjao Tơdrong tơchơ̆t găh pơm Hơtŏk tơdrong pơvei jang hơdoi gĭt kăl tôm tơdrong đơ̆ng Việt Nam păng Australia păng dơ̆ng lăng lêh pơjao ăn băl 11 Hla ar chih kăl găh jang hơdoi lơ̆m tơdrong pơtho pơhrăm; vei kơjăp tơdrong rơngei; vei lăng bơngai răt tơmam; tơlĕch trong tĕch mơdro, tơmât jên jang; jang khoa hŏk-kơmăy kơmŏk, tơplih ‘nao rơgei; jang găh jên hu; tơchĕng hơlen khoa hŏk vă atŏk tơiung choh jang xa, pơtăm ‘long, rong ka hơdang; bơ̆ jang; tơmam drăm cham char bri brăh; păng unh hơyuh.