Khei ‘năr âu ki, kiơ̆ nơ̆r athei đơ̆ng Khul vei lăng jơhngâm pran đe kăn ƀô̆ Trung ương, ƀok Tổng Bí thư Nguyễn Phú Trọng bơ̆ jang răh, hơmet răh jĭ, vei lăng ‘lơ̆ng jơhngâm pran. Anih tơm Chinh trĭ, Ban Bí thư, dôm ƀok Kơdră chĕp kơ̆l tơm dơnơm păng Kơdră chĕp kơ̆l Ban Bí thư pơtho ăn dôm anih juăt jang akŏm khul grŭp giáo sư, ƀak si, bơngai jang rơgei, bơngai juăt jang chĕp kơ̆l rim anih păng hơmet tôm tơmam, kơmăy kơmŏk ‘lơ̆ng hlŏh vă hơmet, vei lăng ‘lơ̆ng jơhngâm pran ăn Tổng Bí thư.

Truh dang ei, yoa athei hơnơ̆ng pơ ‘nhŏ jơnăr vă ƀok Tổng Bí thư hơmet jĭ păng pơm ‘lơ̆ng ăn tơdrong chĕp kơ̆l pơgơ̆r atŭm kơ Khul kơdră chĕp Trung ương Đảng, Anih tơm Chinh trĭ, Ban Bí thư, năng kiơ̆ tơdrong hơgăt bơ̆ jang đơ̆ng Khul kơdră chĕp kơ̆l Trung ương, Anih tơm Chinh trĭ păng Ban Bí thư jăl XIII, tơ̆ hơnăp dang ei Anih tơm Chinh trĭ pơjao ăn ƀok Tô Lâm, Kơdră jang lơ̆m Anih tơm Chinh trĭ, Kơdră teh đak pơgơ̆r tơdrong jang đơ̆ng Khul kơdră chĕp kơ̆l Trung ương Đảng, Anih tơm Chinh trĭ, Ban Bí thư kiơ̆ hơnăp jang, tơdrong gơ̆h jang đei Anih tơm Chinh trĭ hơgăt.

Anih tơm Chinh trĭ krao hơvơn đĭ đăng Đảng, đĭ đăng kon pơlei păng đĭ đăng khul linh lui kiơ̆ tơdrong chĕp kơ̆l pơgơ̆r đơ̆ng Đảng, tơdrong vei lăng đơ̆ng teh đak, mât 1 ƀơ̆r đon, mĭnh jơhngâm, hơnơ̆ng tưk tơiung dôm tơdrong jang đei jơnei gĭt kăl mă teh đak bơ̆n hlôi iŏk đei, adrin yak hlŏh rim tơdrong pơmat tat, pơlong nol, jang đang ‘lơ̆ng dôm tơdrong vă jang đơ̆ng Hop akŏm Đảng lơ̆m teh đak ‘măng mă XIII tơlĕch; vei kơjăp tơdrong sơđơ̆ng chinh trĭ, vei lăng ‘lơ̆ng tơdrong sơđơ̆ng, rơngei, vei kơjăp tơdrong pơm tơm kơjăp mĭnh teh đak, vei lăng ‘lơ̆ng tơdrong sơđơ̆ng lơ̆m tơpôl, hơtŏk tơdrong jang mŭk drăm tơpôl, vei lăng ‘lơ̆ng tơdrong arih xa găh jơhngâm đon, tơmam drăm ăn kon pơlei.