Lơ̆m jơnăr năm ngôi, ƀok Tập Cận Bình đei jơ pơma đam hăm dôm kơdră chĕp kơ̆l tih hlŏh kơ Đảng, Quốc hội, Khul kơdră teh đak Việt Nam. 2 păh drơ̆ng nơ̆r hơtŏk hloh dơ̆ng tơdrong pơvei jang tơbôl Việt Nam - Trung Quốc. 2 păh drơ̆ng nơ̆r hơtŏk ‘lơ̆ng hơnăp jang đơ̆ng “Tơdrong tơchơ̆t jang hơdoi mŭk drăm jơ̆p tơring” (RCEP) păng Tơdrong tơchơ̆t tĕch mơdro đơ̆ng ASEAN - Trung Quốc (ACFTA) tưk tơiung tơdrong tĕch mơdro 2 pang kiơ̆ trong hơtŏ ‘lơ̆ng. 

Hơtŏk tơdrong jang hơdoi kiơ̆ dôm trong jang lơ pang, nhen tơ̆ Liên hợp quốc, Khul jang hơdoi mŭk drăm châu Á - Thái Bình Dương (APEC), Khul jang hơdoi Á - Âu (ASEM), Grŭp dôm teh đak Đông Nam Á (ASEAN), tơgŭm băl lĕch pơjei iŏk jang dôm tơdrong jang tih lơ̆m dôm anih jang lơ̆m apŭng plenh teh. 2 păh drơ̆ng nơ̆r vei lăng păng sek tơlang mă tơgăl dôm tơdrong ưh kơlăp băl, vei kơjăp tơdrong pơvei ‘lơ̆ng Việt – Trung.

Lơ̆m ‘măng năm ngôi, 2 păh kĭ lơ hla ar jang hơdoi găh dôm tơdrong jang pơm trong gre teh, trong gre treng, hơlen năng pơrang jĭ tơ̆ anih vei lăng tơmam tĕch mơdro, jang hơdoi găh khul linh, khoa hŏk kơmăy kơmŏk, jŏh ayŏ kơ dŏ xoang, tơplŏng kơdâu, pơtho pơhrăm, tơdrong jang xa kơ kon pơlei, pơjing khul bơngai jang, roi tơbăt păng jang hơdoi kơ dôm tơring... Tổng Bí thư, Kơdră teh đak Tập Cận Bình bơnê tơdrong pơgơ̆r sơng ‘lơ̆ng hơiă, chơt rơhău, băt ‘mêm băl; tơlĕch nơ̆r krao hơpơi Tổng Bí thư Tô Lâm păng Kơdră teh đak Lương Cường jăh năm ngôi tơ̆ teh đak Trung Quốc./.