Giĕng au ki, Kŏng ty ŭnh hơyuh Đak Lăk iung jang hơdoi hăm Hơnih bơ̆ jang Kanh sat pĭt ŭnh sa păng dŏng tơgŭm găh Kŏng ang dêh char Đak Lăk pơgơ̆r 2 lăm hŏk pơtho tơbăt tang găn ŭnh sa ăn hloh 530 ‘nu kang ƀô̆, bơngai jang hơnih jang Ŭnh hơyuh.

Hnam kmăi ŭnh hơyuh Đak Lăk hrei au vei lăng 17 hơnih jang găh lơ̆m rim hơnih hơmơt đei ŭnh sa, đôh; ‘ngoăih kơ ‘noh 14 hnam chĕp pơgơ̆r jang kơ rim hơnih ŭnh hơyuh tơring. Khei năr au ki, bơ̆ jang tang găn ŭnh sa đôh đei hơnih au lăng ba kơjăp, tơmơ̆t jên jang kơtang vă bơ̆ jang ‘lơ̆ng. Lơ̆m ‘măng pơhrăm au ki, rim kang ƀô̆ bơngai jang hnam kmăi ŭnh hơyuh Đăk Lăk hlôi đei kang ƀô̆ Kanh sat Tang găn hơlau, Pĭt ŭnh sa dêh char Đak Lăk pơtho tơbăt găh tơdrong ŭnh sa đôh, pơtho tơbăt găh khôi luơ̆t đei ƀơm truh bơ̆ jang au. ‘Ngoăih kơ ‘noh, pơtho tơbăt hơdăh trong tang găn hơlau ŭnh sa pĭt ŭnh a, rim bơngai hŏk đei hŏk pơhrăm bơ̆ jang dăr lăng rim tơdrong hơmơt ŭnh sa đôh, trong jang lĕch klĕch lơ̆m hơnih ŭnh sa, trong ming hơmet ăn bơngai jĭ ... Adoi pơhrăm pĭt ŭnh sa, dŏng tơgŭm tơdăh đei tơdrong ŭnh sa tơ̆ hơnih bơ̆ jang Kong ty păng Hnam mong răk Ea Tam. ‘Măng pơhrăm au tơgŭm ăn kang ƀô̆ kông nhân ŭnh hơyuh Đak Lăk pơhrăm ming, atŏk bơ̆ jang gơ̆h hơgei lơ̆m tang găn pĭt ŭnh sa păng dŏng tơgŭm vă pơm dă ƀiơ̆ tơdrong hiong răm găh bơngai păng mŭk drăm tơdăh đei tơdrong ŭnh sa đôh au to.