Ah ‘măng pơtơ̆p đei pơgơ̆r tơ̆ tơring Ea Ktur, Ea Bhốk, Ea Ning pơpơm đei kial phŭt huơ̆r păng grơ̆m kơmlat, ‘long păk tơgơ̆ pơm pơchah tơmam drăm, tơgơ̆ jrăng unh, pơm tơpăt unh lơ̆m tơring. Tenh kuăng đei măt truh anih răm, sơkơ̆t tơdrong tơm đei răm, rim khul jang hlôi tơrĕk hăm Kŏng ti atŭm drơ̆ng nơ̆r trong jang chă hơmet, hơvơn bơngai jang, tơmam drăm, kơmăi kơmŏk vă dah tom hơmet ming.

Đơ̆ng rŏng jê̆ 3 jơ, dôm anih jang hlôi keh đang tơdrong hơmet tơplih jrăng unh răm, chô̆ hơmet tôm tơmam drăm kăl chô̆ unh hơyuh, ot ‘long păk tơgơ̆ choh chong rơhơi rok kiơ̆ anih dui tơlei unh hơyuh. Kiơ̆ tơdrong pơtơ̆p, Anih jang Unh hơyuh Đăk Lăk vă hơtŏk tơdrong tơjră hăm dôm tơdrong răm đei ƀôh, hơmet tơtom dah chô̆ dui  đei unh hơyuh yua hrôih hloh đơ̆ng rŏng kơ đei ƀôh răm.