Đơ̆ng rŏng kơ năm hơlen lăng tơ̆ hơnih teh hơdrŭt, yak blŭng khŭl bơ̆jang hơlen lăng tơdrong tơm pơm ăn hơnhăk truh teh tơdrŭt, hlŭn tơ̆ hơnih dơnâu mong đak Đông Thanh ưh kơ trŏ yua đơ̆ng ‘mi ôh, mă teh lơ̆m hơnih âu đei 1 hơnih hơlih hlôi đei đơ̆ng hơdrol bơih, truh ƀơ̆t tơdrong jang bơ̆jang akŏm hăm lơ tơdrong tơm ƀơm nai hlôi pơm ăn hơnih hơlih âu đei ƀôh hrĕnh hloh.

Lăp ƀơ̆t hơlen lăng teh, khŭl bơ̆jang hlôi đei jơ bơ̆jang hăm dêh char Lâm Đồng găh tơdrong jang tang găn ‘mi kial pơrăm, tơlĕch ăn dôm trong jang ƀơ̆t măt păng đunh đai vă hơmet pơ ‘lơ̆ng tơdrong teh tơdrŭt, hlŭn tơ̆ dơnâu mong đak Đông Thanh. Tơ̆ âu, ƀok Nguyễn Hoàng Hiệp athei dêh char Lâm Đồng kăl kơ bơ̆jang dơ̆ng lơ hơnih koer vă băt hơdăh ƀlep hơnih đei ƀơm ưh kơ ‘lơ̆ng đơ̆ng teh tơdrŭt, hlŭn, kiơ̆ đơ̆ng ‘noh tơlĕch ăn trong jang hơmet pơ ‘lơ̆ng đei yua.