Phŏ Kơdră Kuôk hô̆i Nguyễn Đức Hải gơih nơ̆r hmach thơ thâu jơhngơ̆m pran jăng truh đe  Ƀok phật Anih chĕp kơ̆l Khŭl vei lăng lui phât, Trung ương khŭl lui phât Việt Nam. Hmach thơ thâu khŭl lui phât sơng sơnăm ‘nao 2024 sơđơ̆ng hiôk, liĕm kâu, hơ pơi ‘meh ăn teh đak hiôk, kon pơlei sơđơ̆ng, rim hnam adoi phĭ tơnŏ, hiôk hian. Hòa Thượng Thích Thanh Nhiễu, Phŏ Kơdră chĕp kơ̆l Khŭl lui phât Trung ương khŭl lui phât Việt Nam bơnê tơdrong ‘mêm, tơdrong bơngơ̆t truh đơ̆ng kơdră chĕp kơ̆l Kuôk hô̆i Việt Nam.

Hơdai hăm tơbăt, Khŭl lui phât Việt Nam gô hơnơ̆ng hơtŏk dôm jơnei ‘lơ̆ng lơ̆m tơdrong jang lui Phât sơnăm 2024, hơnơ̆ng yak hơdai hăm hơdrĕch hơdrŭng, hơtŏk dôm jơnei iŏk đei, tơroi tơbăt, krao hơvơn bơngai lui phât pơm kiơ̆ ‘lơ̆ng trong jang đơ̆ng Đảng, tơdrong jang tơgŭm khôi luơ̆t đơ̆ng teh đak, hơtŏk ‘lơ̆ng jơhngơ̆m đon tơgoăt tơgoăl hơdrĕch hơdrŭng tơgop pơjing 1 tơpôl ‘lơ̆ng hơiă, sơđơ̆ng, hiôk chơt.