Phŏ Kơdră Kuôk hô̆i ‘meh vă kon pơlei tơrong groi kông sơlam hơnơ̆ng hơtŏk jơhngơ̆m đon tơgoăt tơgoăl, ‘mêm mơmat băl, tơgŭm băl hơtŏk tơiung jang sa, vei lăng bri păng yak tŏk pơm pơdrŏng đơ̆ng bri. Hơnih kon pơlei oei A Liêng, xăh Tà Bhing đei 207 ŭnh hnam hăm 810 ‘nu bơngai găh dôm bơngai Ve, Giẻ triêng, Khơ Mú, Yuăn... hơdrô̆ bơngai Cơ Tu đei 80% kơsô̆ kon pơlei. Sơnăm 2023, tơdrong arih sa, jơhngơ̆m đon kon pơlei đei hơtŏk ‘lơ̆ng, tơdrong ‘mêm pơlei pơla, kueng ƀôt roi ‘năr roi tơklep hơdai. Kon pơlei tơ̆ A Liêng, xăh Tà Bhing tơ goăt tơgoăl tơgŭm băl hơtŏk tơiung mŭk drăm pơgar, hơdai hăm hơtŏk tơiung vei rong kon tơrong.

Dôm tơdrong jang “Ŭnh hnam pơnam kơ hŏk” đei hơtŏk tơiung păng pơih să. ‘Măng âu, Phŏ Kơdră Kuôk hô̆i Nguyễn Đức Hải hlôi pơjao 10 Hnam tơgoăt tơgoăl asong ăn dôm ŭnh hnam dơnuh hin, arih sa mơmat tat tơ̆ xăh Tà Bhing, apŭng Nam Giang, mĭnh pôm hnam đei kơjă 60 triệu hlak jên, asong lơ tơpu tơmam ăn kơ hŏk tro, bơngai dơnuh hin, bơngai đei đe lui yom păng ŭnh hnam teh đak tơgŭm tơ̆ xăh Tà Bhing.