Phŏ Kơdră Quốc hội Nguyễn Thị Thanh roi tơƀôh dôm tơdrong nol mưh bơ̆ jang hơdoi hăm apŭng plenh teh vă sek tơlang dôm tơdrong lơ̆m plei teh hrei ‘nâu, tơƀôh hơdăh tơdrong tơgŭm đơ̆ng Việt Nam hăm trong jang lơ pang, lơ̆m noh đei hơnăp jang tơm đơ̆ng Liên hợp quốc vă pơgơ̆r dôm tơdrong adrin jơ̆p lơ̆m plei teh.

Ƀât mă Liên hợp quốc păng Việt Nam vang tơbăt 80 sơnăm pơjing păng iŏk đei rơngei lơ̆m sơnăm 2025, Phŏ Kơdră Quốc hội athei tơlĕch lơ trong jang đei yoa ‘lơ̆ng vă hơtŏk tơdrong pơvei jang hơdoi đơ̆ng 2 păh kŭm nhen hơtŏk tơdrong tơguăt trong jang hơdoi đơ̆ng nghị viện vă hơmet kơjăp hlŏh dơ̆ng tơdrong pơvei đơ̆ng Quốc hội Việt Nam hăm tơdrong tơm păng tơdrong jang tih đơ̆ng Liên hợp quốc; athei pơjing tơdrong ‘lơ̆ng vă đei lơ bơngai Việt Nam, lơ̆m noh đei drŏ kăn, vang mât jang lơ̆m dôm anih jang kơ Liên hợp quốc.