Tơroi hăm Khul jang, bơngai dơ̆ng tang ăn Anih chĕp kơ̆l đảng dêh char Sóc Trăng ăn tơbăt, đơ̆ng blŭng jăl jang 2021-2025 truh dang ei, dêh char Sóc Trăng hlôi păng oei tơlĕch lơ tơdrong jang gĭt kăl vang tơgop tưk tơiung mŭk drăm, tơpôl kơ dêh char, lơ̆m nŏh đei 1,2 tơdrong jang đei ƀơm truh ‘lơ̆ng hăm tơdrong jang atŏk tơiung mŭk drăm, tơpôl, tơchĕng adrol truh 2025 vă tơmât yoa Trong gre kơdâu hrĕnh Châu Đốc - Cần Thơ - Sóc Trăng; Tơdrong jang pơm Trong tơm vă atŏk tơiung mŭk drăm Đông Tây; Trong Dăr I, Trong Dăr II... Tơdrong jang mŭk drăm tŏk jô̆ păh lăp lơ̆m 3 sơnăm đơ̆ng 2021 - 2023 đei 5,76% 1 sơnăm. Choh jang xa jang tŏk kiơ̆ trong roi ‘lơ̆ng, roi đei kơjă. Kơsô̆ chŭn na rei pơtăm ƀa ‘lơ̆ng đei hlŏh 90%. Lơ trong jang rong hơdang đei yoa hlôi đei dêh char pơih xă…

Pơma tơ̆ jơ bơ̆ jang, Phŏ Kơdră Quốc hội Trần Quang Phương hơpơi ‘mĕh Đảng ƀô̆ păng Khul kơdră pơgơ̆r tơring kŭm hăm kon pơlei Sóc Trăng hơnơ̆ng vei kơjăp tơdrong mât mĭnh ƀơ̆r đon, hơmet pơ ‘lơ̆ng dôm tơdrong pơmat tat pơlong nol vă jang kĕh dôm tơdrong tơchơ̆t đơ̆ng Hop akŏm mă 13 kơ Đảng păng Hop akŏm Đảng ƀô̆ dêh char ‘măng mă 14 tơlĕch.