Tơpôl kon pơlei Việt Nam tơ̆ Mozambique dang ei đei pơhlom 200 'nu, oei hơrih jang xa sơđơ̆ng tơ̆ dôm tơdrong jang tĕch pơdro, viễn thŏng, pơtho pơhrăm, jang pơgang, păng đe hŏk tro sinh viên. Phŏ Kơdră teh đak bơ̆n hlôi tơroi gah tơdrong jang chĭn trĭ, mŭk drăm, tơpôl, đei hơmet pơ-'lơ̆ng đơ̆ng rŏng kơ pơrang jĭ Covid-19 hơbuh lơ̆m teh đak khei năr âu ki; tơroi gah 'măng năm tơmang teh đak Mozambique kiơ̆ đơ̆ng dôm tơdrong pơma đam hăm Thủ tướng Mozambique, pơma đam hăm Kơdră teh đak păng Kơdră Kuôk hô̆i Mozambique, tơƀơ̆p Tŏng thu kĭ Đảng chĕp pơgơ̆r Frelimo, tang măt ăn dôm anih jang mŭk drăm Mozambique.

Phŏ Kơdră teh đak bơ̆n ră hơdah, Đảng, teh đak hơnơ̆ng tơrĕk truh kon pơlei Việt Nam tơ̆ teh đak đe, lơ̆m noh đei kon pơlei tơ̆ teh đak Mozambique; hmach bơnê kơ kon pơlei tơ̆ Mozambique hơnơ̆ng tơguăt tơguăl, tơgŭm dih băl sơđơ̆ng tơdrong hơrih, hơrih 'lơ̆ng sơđơ̆ng tơ̆ teh đak oei hơrih jang xa.