Tơroi hăm Phŏ Kơdră teh đak Việt Nam, ƀok Kơdră Nyusi hmach bơnê kơ 'măng năm tơmang âu đơ̆ng đe kơdră kơpal, tơƀôh đon lui hăm Phŏ Kơdră teh đak păng dôm tơdrong jang asong khul kơpal năm tơmang dih băl kơ 2 teh đak pơtoi pơjing đei trong jang 'nao, tơgop hơtŏk hloh dơ̆ng tơdrong jang tơbôl lơ tơdrong Việt Nam - Mozambique lơ̆m khei năr truh.

Tơ̆ 'măng tơjrâ̆m, 2 kơdră hơ-iă gah dôm tơđrong đei jơnei lơ̆m jang hadoi lơ̆m lơ sơnăm kơ âu, mă kăl noh gah tơdrong jang chĭn trĭ - tơbôl, choh jang xa, viễn thŏng, pơtho pơhrăm păng jang hadoi hăm lơ khul jang nhen Liên hơp kuôk păng Khul jang ưh đei tơguăt. Ƀar kơdră drơ̆ng nơ̆r pơjao ăn dôm Anih jang tơm, anih jang đei tơrĕk kơ 2 pah păng đei dôm tơdrong jang hơdah kiơ̆ sơkơ̆t jang hadoi hlôi đei rim ƀok kơdră 2 teh đak tơchơ̆t tơlĕch.