Đơ̆ng blŭng khei 7 truh dang ei tơ̆ Sơn La ‘mi kial hơbŭt hlôi pơm 12 ‘nu lôch, hloh 2.600 hnam kon pơlei đei hiong răm, vă jê̆ 30 hnam trưng đei ƀơm ưh kơ ‘lơ̆ng, trong nơnăm, ŭnh điên... đei hư răm kơtang. Jô̆ pơhlom akŏp hiong răm hloh 500 ti hlak jên. Yă Võ Thị Ánh Xuân, Phŏ Kơdră teh đak hlôi gơih nơ̆r vang mơnat tôch kơ dêh truh kang ƀô̆, kon pơlei tơring đak tih tơ̆ Sơn La.

Phŏ Kơdră teh đak kŭm athei Anih tơm vei lăng găh Choh jang sa păng Hơtŏk tơiung tơring tơrang ‘nao đei tơdrong jang ‘lơ̆ng hloh, tơgŭm dôm tơring đa đei ƀôh ‘mi kial đak tih pơtăm nhen Sơn La đei dôm trong jang, tơdra hơdrol, anih jang tơmam drăm thoi yơ vă găn ƀiơ̆ tôch ai ƀơm ưh kơ ‘lơ̆ng truh tơdrong arih sa kon pơlei, tơgŭm kon pơlei sơđơ̆ng tơdrong arih sa. Ƀlep ƀơ̆t ‘măng âu, Phŏ Kơdră teh đak Võ Thị Ánh Xuân hlôi tơgŭm dêh char Sơn La 700 triệu hlak jên; tơgŭm 2 apŭng Mai Sơn păng Thuận Châu 200 triệu hlak jên hơmet ‘lơ̆ng hiong răm đơ̆ng ‘mi kial hơbŭt.