Pơma tơ̆ lơ̆m bơ̆jang tơ̆ dêh char Bến Tre, Phŏ kơdră teh đak Võ Thị Ánh Xuân chhôk ‘nă ƀơ̆t sơnăm âu ki, teh đak bơ̆n hlôi yak hloh lơ mơmat tat, long nol vă iŏk đei 1,2 jơnei gĭt kăl lơ̆m đĭ đăng dôm tơdrong jang. Phŏ Kơdră teh đak athei Đảng bộ, khŭl kơdră păng kon pơlei Bến Tre hơnơ̆ng hơdrin tôch ai iŏk đei dôm tơdrong hơgăt mă Tơdrong tơchơ̆t Hop akŏm rim jăl hlôi tơlĕch ăn; bơngơ̆t truh tơmơ̆t jên jang dôm tơdrong jang joh ayŏ, tơpôl, jang pơgang, pơtho pơhrăm, dôm tơdrong đei yua ăn tơpôl ‘lơ̆ng hloh ăn kon pơlei, mă loi ‘noh jĭ dôm tơring hơtăih hơtŏ, tơring kăn kư̆ kach mang.

Đơ̆ng noh, vă kon pơlei hơtŏk ‘lơ̆ng tơdrong arih sa. ‘Măng âu, Phŏ Kơdră teh đak Võ Thị Ánh Xuân pơjao kơƀang pơrŏ asong ăn dêh char Bến Tre man 10 tŏ hnam tơgoăt tơgoăl, đei kơjă 500 triệu hlak jên; Anih mong jên tơgŭm hơioh Việt Nam asong 200 triệu hlak jên tơgŭm đe oh đei tơdrong arih sa mơmat tat. Hơdai hăm, pơjao asong 200 tơpu tơmam ăn ŭnh hnam dơnuh hin, vă jê̆ dơnuh hin, dôm ŭnh hnam teh đak tơgŭm đei tơdrong arih sa mơmat tat; 200 tơpu tơmam ăn kơ kŏng nhân jang; 200 tơpu tơmam ăn hơioh đei tơdrong arih sa mơmat tat dêh hloh, mơmat tat lơ̆m dêh char, akŏp kơjă 700 triệu hlak jên.