Phŏ Kơdră teh đak Võ Thị Ánh Xuân kŭm hăm khŭl bơ̆jang hlôi năm soh nhang, dan pơ kao tơ̆ hơnih soi kơ Ƀok Hồ păng pơ tăm ‘long lăng jơ̆ng ti tơ̆ Hơnih gru groa teh đak gĭt kăl Pác Bó (xăh Trường Hà, apŭng Hà Quảng). Lơ̆m ‘măng năm bơ̆jang, Phŏ Kơdră teh đak hlôi asong 20 tŏ hnam ăn ŭnh hnam dơnuh hin; asong 50 tơpu tơmam ăn ŭnh hnam teh đak tơgŭm păng 200 ‘nu hŏk tro đei tơdrong arih sa mơmat tat hơdrin lơ̆m hŏk pơhrăm tơ̆ apŭng Hà Quảng. 

Chih iŏk dôm tơdrong hơdrin păng jơnei hơtŏk tơiung mŭk drăm tơpôl đơ̆ng Hà Quảng kŭm nhen đơ̆ng dêh char Cao Bằng iŏk đei lơ̆m khei ‘năr âu ki, Phŏ Kơdră teh đak Võ Thị Ánh Xuân tơtă kơ tơring kăl hơnơ̆ng hơtŏk dôm jên jang, tơmam vă bơngơ̆t truh vei lăng tơdrong arih sa kon pơlei, hơtŏk tơdrong joăt joe pơlei pơla kach mang, hơtŏk tơmam ‘lơ̆ng, đei yua đơ̆ng hơdrol, vă sơng tơmơ̆t jên jang, hơtŏk tơiung mŭk drăm, hơtŏk ‘lơ̆ng tơdrong arih sa kon pơlei.