Kơsơ̆ 30/5, tơ̆ Anih jang kơ ƀok Kơdră tĕh đak, Phŏ Kơdră tĕh đak Võ Thị Ánh Xuân chơt hơiă sơng Khul tang măt ăn Anih Mặt trận Tơguăt mĭnh ƀơ̆r đon jang atŏk tơiung tĕh đak Campuchia yoa ƀok Nhem Valy, Kơdră jang lơ̆m Trung ương Đảng Kon pơlei kăch mang Campuchia, Phŏ Kơdră chĕp kơ̆l pơm hloi Tổng Thư ký Anih Mặt trận Tơguăt mĭnh ƀơ̆r đon jang Atŏk tơiung tĕh đak Campuchia chĕp kơ̆l, oei năm hơpong păng bơ̆ jang tơ̆ Việt Nam.

Tơ̆ jơ tơƀâp, Phŏ Kơdră tĕh đak pơma hơdăh Việt Nam ling lang năng kăl păng tơgŭm tôch ai ăn tơdrong pơm hơtŏk tơdrong pơvei hăm tĕh đak jê̆ băl ‘lơ̆ng hơiă, tơbôl đơ̆ng sơ̆, jang hơdoi tôm tơdrong, kơjăp đunh đơ̆ng Việt Nam păng Campuchia. Tơchĕng ‘lơ̆ng tơdrong jang hơdoi kơjăp đơ̆ng Anih Mặt trận 2 tĕh đak khei ‘năr âu ki, Phŏ Kơdră tĕh đak hơpơi ‘mĕh, tơ̆ hơnăp kơnh, Mặt trận 2 tĕh đak hơnơ̆ng jang hơdoi kơjăp, bơ̆ jang đei yoa ‘lơ̆ng dôm tơdrong drơ̆ng nơ̆r, jang hơdoi hlôi đei kĭ pơkăp; tưk tơiung hơnăp jang đơ̆ng Mặt trận 2 păh lơ̆m rim tơdrong pơvei jang hơdoi đơ̆ng 2 Đảng, 2 tĕh đak păng kon pơlei 2 tĕh đak kŭm nhen lơ̆m tơdrong jang hơdoi đơ̆ng dôm tơring, mă loi jĭ hăm dôm dêh char sơlam kơ 2 tĕh đak.