Đơ̆ng rŏng 32 sơnăm pơjing, truh dang ei dêh char Lào Cai dơ̆ng lơ̆m grŭp hơdrol kơ 14 dêh char tơring Tŏk bŏk păng groi kông tơ̆ găh Tu tĕh đak. Tơdrong jang tŏk mŭk drăm jô̆ păh lăp vă jê̆ 10% 1 sơnăm; akŏm đĭ đăng jên thu mong ăn tĕh đak lơ̆m dêh char loi 10 rơbâu ti; kơsô̆ unh hnam tơnuh jur hrĕnh, đơ̆ng 54,8% (sơnăm 1991) jur pă 19,3%.

Lơ̆m tơdrong hŏk pơhrăm păng jang kiơ̆ Ƀok Hô, Đảng ƀô̆ păng kon pơlei dôm hơdrĕch hơdrung tơ̆ Lào Cai tôch kơchăng, adrin tơchă dôm trong jang ‘lơ̆ng rơgei kiơ̆ đơ̆ng tơdrong chih hơgăt hrôih dôm tơdrong vă pôk pơ ư kăn ƀô̆ păng bơngai chĕp kơ̆l, chih hơdăh tơdrong hơgăt găh hŏk pơhrăm păng jang kiơ̆ Ƀok Hô lơ̆m dêh char hrôih hlŏh lơ̆m tĕh đak. Rim sơnăm hơnơ̆ng tơlĕch trong hơlen năng tơdrong hŏk păng jang kiơ̆ Ƀok Hô. Đơ̆ng sơnăm 2016 truh dang ei, lơ̆m dêh char Lào Cai hlôi pôk pơ ư 3.356 khul grŭp, rim bơngai iŏk đei jơnei ‘lơ̆ng lơ̆m tơdrong hŏk pơhrăm păng jang kiơ̆ Ƀok Hô.

Phŏ Kơdră tĕh đak Võ Thị Ánh Xuân tơtă: Đảng ƀô̆ dêh char Lao Cai athei đei lơ trong jang pran hlŏh dơ̆ng vă hơtŏk tơdrong mât mĭnh ƀơ̆r đon, atŭm hăm ‘nŏh đei lơ tơdrong tơgŭm, trong jang tơgŭm mă hơdăh, lăp ‘lơ̆ng, păng tưk tơiung đei đon adrin jang tŏk đơ̆ng kơdih ăn kon pơlei, pơm thoi yơ vă kon pơlei kon kông jang tŏk ‘lơ̆ng hơnơ̆ng păng đei xa yoa dôm tơdrong jơnei đơ̆ng jang atŏk tơiung tĕh đak.