Pơma tơ̆ jơ pơm lêh, Phŏ Kơdră teh đak Võ Thị Ánh Xuân chih răk păng pôk pơ ư dôm tơdrong jang đei mă Đảng ƀô̆, Khul kơdră pơgơ̆r păng kon pơlei dôm hơdrĕch hơdrung dêh char Hòa Bình pơma atŭm păng apŭng Kim Bôi pơma hơdrô̆ jang đei lơ̆m khei ‘năr âu ki.

Phŏ Kơdră teh đak pơma hơdăh, hrei ‘nâu, lơ̆m teh đak oei akŏm jơhngâm bơ̆ jang khŏm đei tơdrong Tơchơ̆t đơ̆ng Hop akŏm mă XIII, hơmet ăn Hop akŏm bơngai tang măt lơ̆m teh đak ‘măng mă XIV kơ Đảng – 1 Hop akŏm tôch gĭt kăl nhen nơ̆r tơchơ̆t lơ̆m Hop akŏm Trung ương 10 âu ki, hơdai hăm ‘nŏh hơmet ‘lơ̆ng rim tơdrong vă pơgơ̆r Hop akŏm Đảng ƀô̆ dêh char ‘măng mă XVIII, tơlĕch dôm tơdrong vă jang, trong jang tŏk hrĕnh, pran kơjăp, pơjing dêh char Hòa Bình jing dêh char pơdrŏng, đei ƀôh, găh grŭp dơ̆ng hơdrol tơ̆ tơring tŏk bŏk jăl đak krong păng tơring groi kông Găh Tu.