Phŏ Thủ tướng, Kơdră tơm jang tơbôl Bùi Thanh Sơn pơma hơdăh, Lào jĭ teh đak jang lơ̆m khŭl tơnăp, đei hơnăp jang păng nơ̆r pơma roi ‘năr roi đei lăng kăl, tơgop ‘lơ̆ng ăn tơdrong hơtŏk tơiung sơđơ̆ng păng kơjăp kơ tơring, hơdai hăm pơtrŭt jang hơdai đơ̆ng ASEAN hăm dôm teh đak jang hơdai, yua kơ tơdrong rơngei, sơđơ̆ng păng hơnŭk hơnoa kơ tơring păng apŭng plĕnh teh.

Pơma hơdăh, Việt Nam ling lang lăng kăl, tơgŭm hơdrol ‘lơ̆ng hloh ăn tơdrong pơvei gĭt kăl Việt Nam - Lào, Phŏ Thủ tướng lăng ‘lơ̆ng jang hơdai ŭnh hơyuh păng hơlŭng sir iŏk tơmo ngar đơ̆ng Việt Nam - Lào khei ‘năr âu ki hlôi iŏk đei lơ jơnei ‘lơ̆ng, dôm tơdrong jang hơdai ‘lơ̆ng, hơnơ̆ng hơtŏk tơiung. Athei 2 păh kăl kơ hơnơ̆ng pơma dơnuh gĭt kăl tơ̆ rim kơdră vă ŭnh hơyuh păng hơlŭng sir iŏk ngar tơmo jing tơdrong pran lơ̆m jang hơdai đơ̆ng 2 teh đak, Kơdră tơm Phosay Sayasone lui ngeh dôm tơdrong jang ‘nâu roi ‘năr roi iŏk đei jơnei ‘lơ̆ng hloh dơ̆ng tơ̆ hơnăp kơnh.