Tơ̆ hop akŏm, kơdră chĕp kơ̆l dôm Anih tơm, anih jang kơ trung ương akhan, lơ̆m dôm khei blŭng sơnăm rim tơmam yoa kăl đei pơtruh măh mai, kơjă tĕch đei vei lăng sơđơ̆ng lăp hăm tơdrong pơgơ̆r, vei lăng đơ̆ng Anih vei lăng kơjă tơlĕch. Phó Thủ tướng Lê Minh Khái athei, dôm anih tơm, anih jang kơpal, tơring tơrang bơ̆ jang mă ‘lơ̆ng tơdrong vei lăng, hơmet ming, pơm ‘lơ̆ng sơđơ̆ng kơjă dôm tơmam yoa tĕh đak vei lăng. 

Pơtruh măh mai tơmam, hơmet tôm tơmam vă pơtruh tơtom pơm lăp hăm tơdrong ‘mĕh vă đơ̆ng kon pơlei, mă loi jĭ dôm tơmam xa păng tơmam yoa kăl, vă pơm lăp hăm tơdrong ‘mĕh vă răt yoa lơ̆m dôm năr lêh têt ƀât hơtuch sơnăm. Dôm tơring kơchăng bơ̆ jang vei lăng tĕh đak hăm dôm tơmam kiơ̆ hơnăp jang, hơtŏk tơdrong dăr lăng, jang kiơ̆ rim trong jang chih roi tơbăt kơjă, pơklĕm kơjă tơmam; roi tơbăt mă rơđăh rơđong kơjă tơmam drăm.