Tơ̆ hop akŏm, kơdră kơ dôm Anih jang tơm, anih jang Trung ương hlôi pơma đam hơdah hăm dôm jơnŭm jang, anih jang mŭk drăm gah 2 tơchơ̆t âu; akhan, âu jing trong hiôk vă Anih mong jên teh đak adoi nhen dôm anih jang tơmơ̆ng nơ̆r tơgop lơ̆m jang tĕch pơdro, anih jang mŭk drăm, sơkơ̆t hơdah dôm tơdrong tơrĕk vă “chă dôm tơdrong pơhơtŏ” păng đei dôm trong jang trŏ ƀlep vă tơgŭm ăn anih jang mŭk drăm rah păng vei sơđơ̆ng rah jên mong.

Pơtôch hop akŏm, Phŏ Thủ tướng Lê Minh Khái hmach bơnê kơ rim bơngai tang măt ăn dôm anih jang tơm, anih jang mŭk drăm hlôi pơma đam tơpăt jue vă pơm hơdah tơdrong apinh kăl hơlen lăng. Ră hơdah, Anih mong jên teh đak đei 2 anih jang kơpal kăp gĭt, minh mônh noh pơgơ̆r gah asong jên jang, tang găn tơdrong huach kư̆ kă, sơđơ̆ng tơdrong jang mŭk drăm, hơtŏk mŭk drăm. Mă 2 noh, vei sơđơ̆ng jên mong. 'Nâu jing tơdrong tơnap tap, pơkăl đei tơdrong tơguăt hăm dôm trong jang mă hơbĕch păng tơnăp.