Phŏ Thủ tướng Lê Minh Khái sơkơ̆t hơdah, tơdrong jang vei lăng kơjă ah blŭng sơnăm ƀơm lơ tơdrong tơnap tap kơlih đơ̆ng lơ tơdrong. Tơdrong jang mŭk drăm lơ̆m kơpal teh tơnap tap. Huach kư̆ kă ƀôh tơjur mă lei adoi oei kơjung. Lơ̆m teh đak, kơjă ƀơm tơnap tap mă lei kiơ̆ kơ lơ tơdrong tơlĕch. Rim sơnăm kiơ̆ hmă, dôm khei blŭng sơnăm tŏk păng jur dar deh ah khei 4, khei 5/2024.

Mă thoi noh, Kơdră Jơnŭm pơgơ̆r jang vei lăng kơjă pơkăl rim anih jang tơm, rim tơring ưh đei pơhơi lơ̆m tơdrong pơgơ̆r jang. Vă kơchăng tơjră hăm dôm tơdrong tơnap tap lơ̆m vei lăng kơjă lơ̆m dôm khei hơtuch sơnăm 2024, Phŏ Thủ tướng Lê Minh Khái pơkăl rim anih jang tơm, rim tơring kơchăng hơtŏk pran pơm kiơ̆ dôm trong tơlĕch jang đơ̆ng Jơnŭm pơgơ̆r teh đak, Thủ tướng teh đak tơ̆ dôm hla bar chih pơgơ̆r jang păng nơ̆r pơtruh pơgơ̆r đơ̆ng Phŏ Thủ tướng tơ̆ dôm Tơbang sơkơ̆t hop akŏm Jơnŭm pơgơ̆r jang nhen sơkơ̆t.