Phŏ Thủ tướng athei 2 păh jang hơdai kơjăp, tơlĕch jang đei yua “Tơdrong jang hơdai kơ Việt Nam păng Thụy Sĩ jăl jang 2021-2024”, hăm tơdrong tơgŭm hơdrol ‘noh jĭ hơtŏk loi dơ̆ng tơdrong kĕ pơjei ăn tơring mŭk drăm kơdih, hơtŏk tơiung mŭk drăm hơgei, tơjră hăm dôm long nol ‘nao găh hơtŏk tơiung păng tơplih tŏ ‘mi kial. Việt Nam ‘meh vă hơnơ̆ng iŏk đei tơdrong tơgŭm đơ̆ng Thụy Sĩ hăm tơdrong hơdrin hơtŏk tơiung kơjăp đơ̆ng Việt Nam lơ̆m jăl jang truh, mă loi ‘noh jĭ lơ̆m hơtŏk ‘lơ̆ng tơdrong kĕ pơjei đơ̆ng tơring jang mŭk drăm kơdih, jang hơdai mơdro sa....

‘Meh vă Thụy Sĩ vang tơroi băl tơdrong hlôh vao, tơgŭm Việt Nam pơjing khŭl jang pơtho pơhrăm ‘lơ̆ng. Quốc vụ khanh Anih tơm vei lăng Mŭk drăm, Pơtho pơhrăm păng Tơchĕng hơlen Thụy Sĩ Dominique Paravicini hơmĕng păng lui ngeh tơ̆ hơnăp kơnh, anih mơdro sa Thụy Sĩ gô đei măt lơ hloh tơ̆ Việt Nam, hơdai hăm ‘meh vă, tơ̆ anih tĕch mơdro Thụy Sĩ gô đei măt lơ hloh dôm tơmam ‘lơ̆ng truh đơ̆ng  Việt Nam.