Dôm tơring oei xa tơ̆ xăh Lợi Hải đei 2.080 unh hnam, lơ̆m nŏh kon pơlei Raglai đei hlŏh 82%. Dôm sơnăm âu ki, gơnơm bơ̆ jang tơplih ming ‘long pơtăm, kon yŏng păng dôm tơdrong jang tơjur tơnuh hin, kon pơlei tơlĕch jên jang atŏk tơiung mŭk drăm, tôch đei yoa, hơnhăk ăn iŏk yoa kơjăp ‘lơ̆ng. Găh noh dơ̆ng, đei teh đak pơngơ̆t, tơmât kơhrĕng ti hlak jên chô̆ unh điên, pơm trong, man hnam pơgang, man anih pơtruh đak yoa, pơm lăp hăm tơdrong ‘mĕh vă lơ̆m tơdrong arih xa kơ kon pơlei.

Pơma tơ̆ năr lêh, Phó Thủ tướng Lê Minh Khái akhan, năr lêh jĭ jơnăr vă rim anih chĕp kơ̆l Đảng, khul kơdră pơgơ̆r tơring tơƀâp, pơma nuh, chă răp mơ̆ng nơ̆r pơma đơ̆ng kon pơlei; băt hơdăh rim tơdrong hơpơi ‘mĕh đơ̆ng kon pơlei; kŭm hăm kon pơlei pơma nuh, chih tơlĕch trong jang đei yoa ‘lơ̆ng hăm rim tơdrong jang chinh trĭ, atŏk tơiung mŭk drăm, tơpôl, vei sơđơ̆ng teh đak, đơ̆ng noh hơtŏk tơdrong drơ̆ng pôm nơ̆r lơ̆m tơpôl, hơmet kơjăp tơdrong tơguăt đĭ đăng hơdrĕch hơdrung.