Tơ̆ jơ pơma đam, 2 pah chơt hơ-iă hăm dôm tơdrong hơtŏk ‘lơ̆ng gah tơbôl Việt Nam - Nhật Bản, hăm gru kơnăl kăp gĭt noh 2 teh đak hơtŏk jang Tơbôl tôm tơdrong ah khei 11/2023 păng pơgơ̆r hloh 500 tơdrong jang tơbăt 50 sơnăm iung jang tơbôl.

Phŏ Thủ tướng pơkăl Kuôk hô̆i Nhật Bản tơgŭm 2 teh đak hơtŏk tơguăt khul bơngai jang, jang hadoi pơm jang; đei trong jang tơgŭm ăn tơpôl kon pơlei Việt Nam tŏk bŏk oei hơrih, hŏk pơhrăm păng pơm jang tơ̆ Nhật Bản. Kơdră Hă viê̆n Nư-ca-ga tơroi hăm Jơnŭm pơgơ̆r teh đak Nhật Bản gô đei trong pơkăp jang vă hơtŏk tơdrong hơrih păng pơm jang ăn bơngai jang Việt Nam tơ̆ Nhật Bản lơ̆m khei năr hlak jên yên hiong kơjă; hơpơi ‘meh kuôk hô̆i 2 teh đak jang hadoi lơ̆m dôm tơdrong jang apŭng plenh teh mă 2 pah atŭm tơrĕk truh.