Bơ̆ jang kiơ̆ nơ̆r pơtho đơ̆ng Thủ tướng teh đak, ‘năr 7-4, tơ̆ dêh char Tiền Giang, Phó Thủ tướng Trần Hồng Hà kŭm hăm ƀok Lê Minh Hoan-Kơdră tơm vei lăng choh jang xa păng atŏk tơiung tơring tơrang păng ƀok Đặng Quốc Khánh-Kơdră tơm vei lăng tơmam drăm păng cham char pơgơ̆r hop akŏm trư̆k tuyê̆n hăm dôm dêh char tơ̆ tơring Teh tơmăn đak krong Cửu Long, đei: Tiền Giang, Bến Tre, Sóc Trăng, Cà Mau, Kiên Giang, Bạc Liêu, Long An găh tơdrong ‘nâu. Pơyan phang sơnăm ‘nâu, yoa đak krong Mê Kông hrŏ truh 7% pơting hăm rim sơnăm kơna tơring teh tơmăn đak krong Cửu Long đei đak ƀoh hrơm mât hrôih, mât hlom ƀiơ̆ kơ rim sơnăm adrol sơ̆, ‘mi klui; mă loi đei 3 ‘măng tŏ phang tôch dêh đei truh ƀât blŭng khei 5. 

Pơma tơ̆ jơ bơ̆ jang hăm khul jang đơ̆ng Khul kơdră teh đak, kơdră chĕp kơ̆l dôm dêh char athei dôm Anih tơm, anih jang tơ̆ trung ương păng Khul kơdră teh đak tơgŭm man pơkĕh dôm dơnâu mong đak klĕp ‘lơ̆ng, dôm anih pơtruh đak yoa tơ̆ dôm tơring tơter đak dơsĭ, hơmet pơ ‘lơ̆ng teh hlŭn tơdrŭt, hơlih…Pơma pơtôch jơ bơ̆ jang, Phó Thủ tướng Trần Hồng Hà tơtă ăn dôm tơring athei chih iŏk ƀai hŏk kăp gĭt lơ̆m tơdrong tang găn đak ƀoh mât, hơlen năng đak ƀlăng, đei trong jang kơchăng ƀiơ̆ lơ̆m tơdrong tang găn đak ƀoh mât tơ̆ rim tơring, kiơ̆ đơ̆ng dôm dơnâu mong đak.