Phó Thủ tướng pơma hơdăh, dôm trong jang pơgơ̆r vei lăng yă tơmam vă pơm ‘lơ̆ng găh đei kơjă tơmam tŏk hlŏh tơdrong mưh bơ̆ jang kiơ̆ trong hơmet ming jên khei đơ̆ng ‘năr 01/7 truh. Găh trong sek tơlang dôm tơdrong tơtŏ hrei ‘nâu, Phó Thủ tướng pơma truh tơdrong vei lăng ‘lơ̆ng tơdrong sơđơ̆ng, tơpăt; pơ ‘nhŏ jên vă tơlĕch jang dôm tơdrong tơgŭm lơ̆m tơpôl, pơm hơtŏk tơdrong arih xa ăn kon pơlei, hơmet ming tơdrong ưh sơđơ̆ng đơ̆ng unh xa đôh.

Pơma pơtôch jơ apinh jet tơ̆ Hop akŏm mă 7, Kơdră Quốc hội Trần Thanh Mẫn pơma hơdăh, đĭ đei 162 ‘nu bơngai tang măt iung apinh păng 31 ‘măng bơngai tang măt iung pơma pơjăh. Kiơ̆ đơ̆ng apinh jet păng tơl nơ̆r apinh jet ăn ƀôh, dôm tơdrong đei apinh pơm lăp hăm tơdrong ‘mĕh vă tơ̆ yăn âu, “trŏ” hăm dôm tơdrong mă bơngai tăh hla, Kon pơlei lơ̆m teh đak păng dôm bơngai tang măt Quốc hội tơrek truh.