Phó Thủ tướng Trần Hồng Hà hơiă hăm jăl jang ‘nao đơ̆ng yă Angela Pratt tơ̆ Việt Nam păng tơchĕng ‘lơ̆ng tơdrong pơgơ̆r jang đơ̆ng Anih vei lăng jang pơgang apŭng plenh tĕh ƀât mă apŭng plenh tĕh oei tơjră hăm lơ tơdrong nol găh tơdrong jĭ. Lơ̆m nŏh, tơdrong tơgŭm đơ̆ng WHO tơgop ‘lơ̆ng ăn Việt Nam lơ̆m tơdrong tang găn jĭ COVID-19 păng jing 1 lơ̆m dôm tĕh đak pơih ‘măng jang mât lĕch hrôih đơ̆ng rŏng kơ jĭ.

Pơma nuh găh tơdrong ‘mĕh iŏk yoa pơgang, tơmam, kơmăy kơmŏk pơyoa ăn jang pơgang, vaccine ‘lơ̆ng, kơjă lăp ai, Phó Thủ tướng Trần Hồng Hà athei Anih vei lăng jang pơgang apŭng plenh tĕh hơnơ̆ng tơgŭm ăn Việt Nam, mă loi jĭ dôm kơloăi vaccine oei ưh kơmăh lơ̆m tơdrong ƀet bơ̆ng pơih xă.

Yă Angela Pratt pơma hơdăh, WHO păng Khul kơdră tĕh đak Việt Nam đei tơdrong pơvei, jang hơdoi tôch kơjăp, đei yoa ‘lơ̆ng đunh khei ‘năr, ‘nâu jĭ tơdrong gĭt kăl vă 2 păh hơnơ̆ng sek tơlang dôm tơdrong pơmat tat găh jang pơgang hrei ‘nâu. Tơ̆ hơnăp kơnh, WHO vă hơnơ̆ng jang hơdoi kơjăp hăm Anih tơm vei lăng jang pơgang vă hơtŏk tơdrong iŏk yoa vaccine găh tơdrong jang ƀet bơ̆ng pơih xă.