9 khei âu ki, tơdrong sơđơ̆ng trong nơnăm hơnơ̆ng đei lơ tơplih ‘lơ̆ng pơtêng hăm khei ‘nâu sơnăm 2022; gre tơ̆m pơ̆k preh băl hơnơ̆ng đei jur. Lơ̆m teh đak hlôi đei ƀôh hloh 8.300 ‘măng gre tơ̆m preh băl, jur 194 ‘măng păng jur 124 ‘nu lôch pơtêng hăm khei ‘nâu sơnăm sơ̆. Kơ sô̆ ‘măng hrăt hrot tơ̆ trong tơm lơ̆m dôm năr đei tơdrong, lêh, têt jur lơ pơtêng hăm khei ‘nâu sơ năm 2022.

Tơ̆ jơ bơ̆jang, Phŏ Thủ tướng Trần Lưu Quang tơroi tơdrong tơm lơ̆m jăl khei mă 4 kăl kơ dui tơ jur gre tơ̆m prăh băl đơ̆ng 5-10% lơ̆m pơđĭ 3 tơdrong hơgăt; hơmet pơ ‘lơ̆ng tơdrong hrăt hrot tơ̆ dôm trong gre tơm, dôm trong gre tih, tơ̆ dôm anih kơ drơ̆m tih păng ưh kơ lê̆ đei ƀôh hrăt hrot kơtang pơdui đunh. Phŏ Thủ tướng akhan, trong jang phak đơ̆ng rŏng hăm dôm bơngai pơm glăi trong nơnăm hlôi hơtŏk đei yua, hơdai hăm athei dôm anih tơm, anih jang, tơring akŏm bơ̆jang kiơ̆ 8 grŭp hơnăp jang tơm hlôi tơlĕch ăn vă vei sơđơ̆ng trong nơnăm.