Kiơ̆ đơ̆ng hơlen năng, Phó Thủ tướng athei kơdră chĕp kơ̆l dêh char Điện Biên, dôm anih jang đei ƀơm truh păng khul linh ƀô đô̆i kơ dêh char hơtŏk hrĕnh hlŏh dơ̆ng tơdrong hơmet pơ ‘lơ̆ng hiong răm đơ̆ng sar bar, tŏ ‘mi kial kơnê̆, jăh chưk hơmet tơring oei vă pơm hnam oei xa, pơm sơđơ̆ng tơdrong arih ăn kon pơlei tơ̆ tơring đei đak tơjroh, teh hơlih; hơtŏk hrĕnh tơdrong roi tơbăt păng khŏm chông tơlĕch dôm unh hnam oei đei dơ̆ng tơ̆ tơring krê hơmơt teh hơlih vă vei lăng sơđơ̆ng ‘lơ̆ng tơdrong arih, tơmam drăm ăn kon pơlei.

Đơ̆ng rŏng kơ ‘mi tih đak tơjroh, athei hơtŏk tơdrong jang pơgang vă vei lăng ‘lơ̆ng jơhngâm pran ăn kon pơlei, mă loi hăm bơngai kră păng đe hơioh. Phó Thủ tướng oei athei Anih vei lăng kon pơlei apŭng Điện Biên tơgŭm, hơmet pơ ‘lơ̆ng mir na kon pơlei đei đak tơjroh, tĕh dơ̆k kơlơ̆p; tơplih ming ‘long pơtăm vă kon pơlei đei tơmam jang, atŏk tơiung mŭk drăm.