Phó Thủ tướng Trần Lưu Quang ăn tơbăt truh đĭ sơnăm 2023, jên tơgŭm đĕch đơ̆ng Khul kơdră teh đak Hàn Quốc kiơ̆ đơ̆ng KOICA ăn Việt Nam đei dang 600 triu đô la Mi. Phó Thủ tướng athei KOICA hơnơ̆ng hơtŏk tơdrong tơgŭm đĕch ăn Việt Nam, mă loi găh tơdrong tơplih ‘nao rơgei, tơplih hăm kơmăy sô̆, atŏk tơiung kơmăy kơmŏk ‘nao. 

Atŭm hăm ‘nŏh athei KOICA set hơlen, athei Khul kơdră teh đak Hàn Quốc đei nơ̆r pơkăp tơpă ăn Tơdrong jang pơtruh unh điên tơ̆ tơring tơrang đơ̆ng tơlei unh điên teh đak tơ̆ dêh char Điện Biên, hăm kơsô̆ jên vă jang dang 20 triu đô la Mi. Kơdră KOICA Chang Won-sam ăn tơbăt, Khul kơdră teh đak Hàn Quốc păng KOICA tôch năng kăl tơdrong pơvei hăm Việt Nam, tơchĕng adrol lơ̆m sơnăm ‘nâu vă hơtŏk jên ODA ăn Việt Nam tŏk hlŏh 52 triu đô la Mi, tŏk vă jê̆ 50% pơting hăm sơnăm 2023, Kơdră KOICA pơma thoi noh.