Tơ̆ jơtơƀâp, 2 păh pơma nuh tôch hơlen găh tơdrong bơ̆ jang 1,2 tơdrong jang ODA tơ̆ Việt Nam, Phó Thủ tướng Trần Lưu Quang pơma hơdăh, Khul kơdră tĕh đak Việt Nam oei adrin tôch ai vă hơmet pơ ‘lơ̆ng rim tơdrong pơmat tat, tơhlăk tăk vă hơtŏk dôm tơdrong jang ‘nâu, athei găh Nhật Bản pơtruh ODA ăn 1,2 tơdrong jang pơm trong gre treng, tơplih hăm kơmăy sô̆, jang tơplih rơgŏh ‘lơ̆ng păng tơjră hăm tŏ ‘mi kial tơplih tơ̆ Việt Nam.

Phŏ Kơdră pơgơ̆r JICA roi tơbăt hăm Phó Thủ tướng Trần Lưu Quang găh trong tơgŭm ODA chăl ‘nao ăn Việt Nam tơ̆ hơnăp kơnh, đei hloi dôm kơsô̆ jên asong tŏk iŏk mưh đei tơdrong rơhyŭng rơhyăng găh jang pơgang lơ̆m tơpôl, tơdrong răm đơ̆ng sar bar tŏ ‘mi kial kơnê̆, tơgŭm găh dôm kơsô̆ jên tŏk iŏk kiơ̆ anih pơm kơdranh păng tơgŭm jên ăn anih jang kơdih bơ̆ jang dôm tơdrong jang man anih jang, pơm trong.