Lơ̆m vă jê̆  8 khei, jâ̆p teh đak đei 1 rơbâu 753 tơdrong răm đơ̆ng cham char, pơm lôch păng rơka truh 450 ‘nu bơngai; 1 rơbâu 176 ha bri ƀơm unh sa; tơglơh tơpăr bơbŭng hloh 9 rơbâu tŏ hnam; hư răm 45 rơbâu ha ƀa păng tơmam pơtăm... Kơchăng hơmet tơdrong răm đơ̆ng cham char, ‘noh hơvơn đei hloh 53 rơbâu ‘nu bơngai păng 3 rơbâu 633 kơmăi kơmŏk lơ kơluăi. Sơkơ̆t ah tơdrong hop akŏm ăn ƀôh, mă tơdrong tơroi pơtơ̆ng đei tơrĕk, chŏng mă minh ƀar jơnŭm pơgơ̆r tơring păng kon pơlei oei pơhơi hăm tơdrong răm đơ̆ng cham char; tơdrong răm noh tih tên tơpă, mă kăl hăm tơdrong hơrih kon pơlei ƀơ̆t đei ‘mi kial đak hơbông, teh hơlih...

Sơkơ̆t ah pơtôch hop akŏm, Phŏ Thủ tướng Trần Lưu Quang drơ̆ng nơ̆r hăm 12 sơnong jang tơm đei tơlĕch. Phŏ thủ tướng ră hơdah, răm đơ̆ng cham char đơ̆ng khei năr âu truh hơtuch sơnăm hơbŏ oei ƀôh dơ̆ng, ‘noh bơ̆n athei kơchăng hloh, rim Anih jang tơm păng tơring athei hơlen dôm sơnong jang kơ po vă asong jang mă trŏ ƀlep hăm tơdrong kăl kơ jang lơ̆m tơjră ‘mi kial cham char pơrăm.